Viti 2023, do t’i kushtohet shkrimtarit dhe poetit Petro Marko, që është një nga figurat më të rëndësishme të letërsisë shqipe. I konsideruar si shkrimtar i brezit të humbur, Marko me romanet e tij bëri një kthesë në letërsinë shqipe, ndonëse vlerësimi iu mohua nga diktatura.
“Jam pak si e vrarë shpirtërisht sepse në momente të tilla gjithmonë kujtoj ato që ka hequr ai dhe momentet e tij. Një nga vuajtjet e një shkrimtari është kur të heqin të drejtën e botimit, nga letërsia shqipe dhe nga shkollat, dhe rri me vite që mos të kujtohet nga lexuesit. Më vjen mirë që e ka kaluar këtë periudhë heshtjeje. Por lexuesit babin nuk e kanë harruar”, tha Arianita Marko, vajza e Petro Markos.
Liria e fjalës dhe e veprës, kushtonte shumë në kohën kur ai krijoi, megjithëse asnjëherë nuk u tërhoq nga ajo çfarë besonte.
“I është thënë herë pas here që mos fliste, por babi i tillë ishte nuk heshte dot”.
Sot në arkivën e familjes e bija Arianita, ruan shumë ditarë të tij që do ta shohin dritën e botimit. Për studiuesin Behar Gjoka, figura e shkrimtarit “rebel”, ka nevojë të ridimensionohet në kulturën letrare sot.
“Për mua ai bëhet sikur njihet, por nuk është njohur në kuptimin e pozicionit që duhet të ketë në program, e një qasje të monografisë letrare si poet romancier, publicist. Kanë munguar përpjekjet për ta sjellë në këtë kohë sepse rileximi na mundëson të kuptojmë se cili ishte kontributi i tij në raport me letërsinë”, tha Gjoka.
Sot mes shkrimtarësh e poetësh, por dhe miqsh u kujtua në 110-vjetorin e lindjes shkrimtari, i cili la gjurmën e tij përmes krijmtarisë dhe fjalës shqipe. Ky vit i Petro Markos do të jetë i mbushur me aktivitete për figurën e tij./tvklan
