12 herët e kaluara, nuk patën sukses.
Për të 13-tën herë, iu drejtuan Gjykatës Kushtetuese të enjten.
Kështu organizata për dëmet e luftës “Ngritja e Zërit” po kërkon shqyrtimin e kushetueshmërisë së vendimit të Supremes.
Kjo e fundit, ua kishte refuzuar paditë, për kompensimin e dëmeve të shkaktuara gjatë luftës në Kosovë.
“Që 17 vite jemi duke punuar ditë e natë për të gjitha palët e dëmtuara më cilësinë e viktimave të luftës, me një të vetëm kundër qeverisë së Serbisë për kompensim të dëmeve. Sot është e trembëdhjeta herë që i dorëzojmë dosjet këtu. Gjykatat e rregullta dhe Supremja nuk janë duke i zbatuar ligjet përkatës për çka janë të thirrur dhe janë kompetent. Ligji për procedurën kontestimore”, tha Jahir Bejta- kryetar i organizatës “Ngritja e Zërit”
Por, sa është sasia e dosjeve për dëmet e shkaktuara gjatë luftës, që kjo organizatë arriti t’i mblidhte deri më tani?
“Sasia e dosjeve, ne i kemi mbi një mijë dosje, mbi 110 dosje që janë dorëzuar në Gjykatën Kushtetuese të Kosovës, përgjigja është e njëjtë. E dinë që Kosova nuk është në Këshillin e Evropës, shumë afër kemi qenë vitin e kaluar të anëtarësohemi. Nuk po kemi të drejtë t’i përcjellim në Strasburg ndaj ato po ndalen këtu”, tregoi Bejta.
Bashkë me anëtarët e kësaj organizate, të enjten ishte edhe pala paditëse.
Muhamet Fejza nga Vojniku i Skenderajt, tha se lufta e fundit iu shkaktoi dëme të shumta materiale.
“Dëme të mëdha kanë qenë, lokalin na e kanë shkatërruar. Shtëpitë na i ka ë shkatërruar, traktorët na i kanë marrë. Gjithçka që kemi pasur e kanë shkatërruar”, tha ai.
Ndryshe, Organizata “Ngritja e Zërit”, që nga viti 2008, ka ndërmarrë veprime ligjore për kompensimin e dëmeve të shkaktuara nga lufta, duke përfshirë dëme në njerëz dhe pronë.
