Edhe në rigjykim, Ekrem Bajroviq është dënuar me 12 vite burgim, për krime të luftës në Istog.
Megjithatë, i mbijetuari i vetëm i masakrës së Saradranit, u shpreh i pakënaqur me këtë dënim.
Naim Elshani tregoi se edhe sot, 27 vite pas, plagët i kullojnë gjak.
Mëngjesi i së premtes i gjeti përsëri në gjykatore.
Janë këtë dëshmitarët e krimeve e torturave për të cilat akuzohet Ekrem Bajroviq.
E kësaj radhe ata po presin shpalljen e aktgjykimit për ish pjesëtarin e ushtrisë serbe.
Pas tyre më pranga në duar erdh edhe i akuzuari.
Këtij të fundit, edhe në rigjykim iu vërtetua dënimi prej 12 vitesh për krimet e luftës në pranverën e vitit 1999 në komunën e Istogut.
“Në emër të popullit shpallim këtë aktgjykim: I akuzuari Ekrem Bajrovic më të dhënat personale si në shkresat e lëndës, gjykata e shpallë fajtor për veprën penale krime lufte ndaj popullatës civile në bashkëkryerje, nga neni 142. Të akuzuarin e gjykon më dënim burgim në kohëzgjatje prej 12 viteve në të cilin dënim do të llogaritet edhe koha e kaluar në paraburgim nga data 19.10.2022”, deklaroi gjykatësi Avni Syla.
Por, me këtë dënim nuk është i kënaqur edhe Naim Elshani, i cili është i mbijetuar i vetëm masakrës së Saradranit.
“Ende sot plagët më kullojnë gjak. Unë nuk pajtohem me këtë vendim. Po, besoni që mua këta më kanë pushkatuar serbët dy herë. Sot jam duke u pushkatuar edhe nga, ndoshta edhe nga shqiptarët, nga gjykatat. Unë nuk kam sigurim, nuk kam mbrojtje, çdo ditë kërcënohem nga njerëzit që nuk ia duan të mirën Kosovës. Jeta ime ka qenë në rrezik disa herë. Kam kërkuar mbrojtje nga prokurori, nuk mu ka ofruar mbrojtje. Unë edhe me shpenzimet e mia, me qindra herë kam ardhur që pesë vjet. Kam kërkuar për transport për dëshmitarë. Nuk vijnë dëshmitarët që janë maltretuar gjatë viteve ’90 deri në vitin 1999”, kujton Elshani.
E i pakënaqur me vendimin është edhe dyshimtari Ylber Lipa. Megjithatë, sipas tij brengosës vazhdon të mbetet mos trajtimi i duhur i dëshmitarëve.
“E keqja e gjithë kësaj është mospërkrahja e dëshmitarëve nga shteti, mosinteresimi i dëshmitarëve që të vijnë pa marrë parasysh rrethanat me të cilat ne jemi përballur, jo vetëm me shpenzime, por me të gjitha pasojat. Në rastin konkret të Naimit si dëshmitar kryesor, ai përballet me probleme shëndetësore, me pasoja dhe trauma psikologjike, si dhe me të gjitha të tjerat. Shpresojmë që drejtësia, sado me vonesë, do të bjerë në vend”, pohoi Lipa.
Më 19 korrik 2024, Gjykata Themelore e kishte shpallur fajtor Bajroviqin dhe e kishte dënuar me 12 vjet burgim, mirëpo më kërkesë të Supremes, çështja ishte kthyer në rigjykim.
Bajroviq akuzohet se si pjesëtar i forcave policore dhe ushtarake serbe, individualisht dhe në bashkëkryerje me persona të tjerë, ka kontribuar në aplikimin e masave represive të vrasjes, bastisjes, rrahjes, maltretimit, arrestimit, trajtimit në mënyrë mizore dhe çnjerëzore të popullsisë civile shqiptare.
