Afër 1 milionë njerëz dolën në rrugët e Liverpoolit të hënën.
Krejt kjo për ta parë nga afër ekipin e tyre, në festën e titullit të 20-të, të Premier League.
Por, festa madhështore u zbeh në përfundim të ditës.
Krejt kjo, pasi një 53 vjeçar hyri me veturë mes turmës së tifozëve, duke goditur 47 prej tyre.
E në mesin e atyre që udhëtuan për të festuar në Liverpool, ishin edhe 12 tifozë kosovarë.
Por nga Kosova Reds, thonë se tifozët kosovarë, janë shëndosh e mirë.
“Sipas informatave që i kemi marrë prej shokëve atje që kanë qenë, incidenti ndodhi afër, por jo në pjesën ku ishin Kosova Reds. Ata na njoftuan që 12 anëtarët e grupit që shkuan për me përcjell paradën e Liverpoolit, të gjitha janë mirë dhe gëzojnë shëndet e të mirë. Ata kanë kaluar mirë, disa prej tyre kishin edhe fatin të siguronin bileta për lojën ku u ngrit edhe trofeu i Premier Ligës”, ka thënë Bajgora nga Kosova Reds
Ndërkohë ata që e përjetuan tmerrin, kanë rrëfyer për të.
“Dëgjuam britma dhe kur ngritëm kokën, pamë një veturë me ngjyrë të zezë që po vinte drejt nesh. Ne kërcyem me shpejtësi, pastaj e larguam edhe vajzën e vogël nga rruga. Duhet të ketë qenë afër 50 km në orë derisa po kalonte. Pastaj shumë njerëz filluan ta ndiqnin makinën”, ka thënë njëra nga dëshmitaret e Chelsea.
“Kishte shumë njerëz që e ndiqnin veturën. Disa që përpiqeshin të hynin bren saj e dikush po shkonte drejt derës së pasagjerit për të hyrë. Xhami i pasmë ishte tashmë i thyer. Kishte dhjetëra njerëz që filluan ta ndiqnin, përderisa të tjerët po ndihmonin të lënduarit dhe policët po vraponin në mes të rrugës” , thënë dëshmitari tjetër Peter Jones.
E pas kësaj ngjarje, kryetari i Liverpoolit, thotë se qyteti u bashkua ashtu siç këndojnë tifozët e ekipit anglez para çdo ndeshje.
“Dje kishte ndoshta një milion njerëz në rrugë për të parë paradën sepse Liverpuli fitoi Premier League dhe herën e fundit njerëzve nuk u lejua të festonin për shkak të Covid-it. Qytetarët këtu do të bashkohen, ashtu siç bëjnë gjithmonë. Vendasit thanë se do t’u hapnin derën njerëzve nëse nuk mund të ktheheshin në shtëpi, ishin oferta për transport me makina në mënyrë që njerëzit të mund të shkonin në destinacionet e tyre. Ky është njerëzimi i vërtetë i njerëzve të mëdhenj të këtij qyteti”, ka thënë Rotherham.
Sipas organeve të rendit në Liverpool, hetimet për këtë incident janë duke vazhduar.
