Prokuroria Themelore në Pejë ka njoftuar se janë ndaluar 12 persona në Junik, nën dyshimin për përfshirje në veprën penale “Organizimi i skemave piramidale dhe bixhozit të paligjshëm”.
Lajmin e ka konfirmuar zëdhënësi i Prokurorisë në Pejë, Shkodra Nikçi, i cili bëri të ditur se gjatë aksionit janë siguruar edhe prova materiale.
“Prokurori i shtetit ka ndaluar 12 persona nën dyshimin se kanë kryer veprën penale ‘Organizimi i skemave piramidale dhe bixhozit të paligjshëm’. Gjithashtu, janë sekuestruar para kesh dhe prova tjera materiale të cilat do të shërbejnë në këtë proces penal”, tha Nikçi.
Sipas Prokurorisë, hetimet lidhur me këtë rast janë në vazhdim, ndërsa ndaj të dyshuarve pritet të ndërmerren veprime të mëtejme ligjore në përputhje me procedurat penale.
