Telekomi i Kosovës ka mirëpritur vendimin për vendimin e Ministrisë së Drejtësisë, për shkarkimin nga detyra të Përmbaruesit Privat, Ilir Mulhaxha.
Në komunikatën e Telekomit thuhet se Mulhaxha edhe në rastin e Telekomit të Kosovës, në emër të interesave të “Dardafon.net”/ Z-Mobile, ka bërë shkelje të detyrave.
“Edhe në rastin përmbarimor, kundër Telekomit të Kosovës, në emër të interesave të “Dardafon.net”/ Z-Mobile janë konstatuar abuzime dhe shkelje të kësaj natyre, të kryera nga ana e z. Mulhaxha, që karakterizohen me tejkalim të autorizimeve, shkelje të dispozitave ligjore dhe me ngarkim të TK me shuma të paqena dhe të paarsyetuara të borxheve që janë përtej detyrimit të caktuar nga vendimi i arbitrazhit / dokumentit përmbarimor. Në rastin tonë, gjatë zhvillimit të procedurës përmbarimore, ku TK Sh.A ka qenë palë debitore, z. Mulhaxha krejtësisht në mënyrë të njëanshme, të papërgjegjshme dhe kundërligjore përfaqësonte dhe anonte kah interesat e kompanisë Dardafon.net dhe pronarëve të saj”, thuhet në komunikatë.
Sipas kësaj kompanie dëmi që u është shkaktuar nga veprimet e Mulhaxhës është rreth 14 milionë euro.
“Vetëm në rastin e Telekomit, dëmi që është shkaktuar nga ushtrimi i papërgjegjshëm dhe i kundërligjshëm i detyrës së përmbaruesit nga ana e z. Mulhaxha, vlerësohet se kap shumën prej rreth 14 Milionë Euro, duke përmbaruar për interesa të veta apo të tjetërkujt, përtej detyrimeve nga dokumenti përmbarimor. Fatkeqësisht, të gjitha ankesat dhe kërkesat e parashtruara nga Telekomi në procedurën përmbarimore të zhvilluar pranë zyrës se përmbaruesit privat, nuk dhanë rezultate. Si rrjedhojë, z. Mulhaxha dhe interesat që ai përfaqësonte, fatkeqësisht gëzuan mbështetjen nga segmente të sistemit të drejtësisë dhe mbetën të pandëshkuara gati të gjitha abuzimet e kryera ne rastin e Telekomit”, thuhet ndër të tjera në komunikatë.
Ministria e Drejtësisë të martën ka nënshkruar vendimin për të pushuar nga detyra përmbaruesin privat Ilir Mulhaxha për kryerjet të veprimeve në kundërshtim me ligjin./teve1.info/
