Një nga udhëheqësit e grupit që ka sulmuar ekipin e Kallxo.com në Leposaviq me datë 29 maj, është arrestuar sot. Këtë e ka konfirmuar ministri i Punëve të Brendshme, Xhelal Sveçla.
Ai ka bërë të ditur se personi i arrestuar është Nemanja Vllaskovic, ku tha se i njëjti do të ballafaqohet me drejtësi për sulmet e kryera ndaj gazetarëve.
Ministri tha se të gjithë sulmuesit dhe kriminelët do të sillen para drejtësisë, kjo nuk ka alternativë.
“Të gjithë sulmuesit dhe kriminelët do të sillen para drejtësisë, kjo nuk ka alternativë. Përgëzoj Policinë e Kosovës për punën në hetimin dhe arrestimin e sulmuesit e gazetarëve. Vazhdojmë, të përkushtuar, për drejtësi e pa kompromis kundër milicisë fashiste”, ka shkruar ministri në Facebook.
Këtë lajm e ka konfirmuar edhe Policia e Kosovës.
“Si rezultat i punës dhe hetimeve intensive të njësiteve policore, është arritur të identifikohet një person i dyshuar i cili me datë 29 maj 2023 në Leposaviq, kishte sulmuar gazetarët e disa mediumeve. Pas sigurimit të dëshmive dhe identifikimit të personit të dyshuar (mashkull serb), i njëjti është arrestuar sot në orët e pasdites në Leposaviq dhe më pas është shoqëruar në stacion policor për intervistim dhe procedura të mëtejme policore. Të gjitha veprimet e mëtejme do të ndërmerren në bashkëpunim dhe koordinim me organet e drejtësisë”, thuhet në njoftimin e Policisë.
Më tej në njoftim thuhet se Policia e Kosovës, mbetet e përkushtuar në realizimin e detyrave të saja ligjore dhe kushtetuese, për ruajtje të rendit dhe sigurisë publike, për sundim të ligjit dhe sjelljen para organeve të drejtësisë të personave të dyshuar që bien në kundërshtim me rendin dhe ligjin. /teve1.info/.
