Të shtunën shënohen 11 vjet nga anëtarësimi i Kosovës në Organizatën Ndërkombëtare të Frankofonisë, një prej organizatave më të mëdha ndërkombëtare me 77 shtete anëtare.
Për këtë, ish-ministri i Jashtëm, Enver Hoxhaj e ka kujtuar këtë moment si një nga arritjet më të rëndësishme diplomatike të Kosovës.
“Para 11 vitesh, e çuam Kosovën në Frankofoni, një nga organizatat më të mëdha ndërkombëtare. Si Ministër i Jashtëm, e udhëheqa këtë proces me muaj pune, negociatash dhe lobimi, sepse Kosova duhej të kishte vend në tryezat ku merren vendime,” ka deklaruar Hoxhaj.
Ai thekson se anëtarësimi i vitit 2014 ishte dëshmi se Kosova mund të funksionojë si partnere e barabartë në arenën ndërkombëtare.
“Ishte provë se Kosova mund të njihet, të dëgjohet dhe të trajtohet si partnere e barabartë,” ka shtuar ai.
Hoxhaj theksoi se është koha që diplomacia kosovare t’i rikthehet standardeve të asaj periudhe.
“Kosova ka kapacitet të anëtarësohet në Këshillin e Evropës dhe organizata të tjera ku e ka vendin. Me vizion dhe lidership të qartë, këto suksese i kthejmë në realitet,”ka shkruar ai./teve1.info/
