Teve1.info ka siguruar fotografi nga atje, ku janë parë forca të shtuara të KFOR-it.
KFOR ka krijuar një kordon me blinda dhe tela të gjembuar në zonën ku janë policia në Jarinjë.
Ndërsa, sot është paralajmëruar për një protestë të serbëve në afërsi të Jarinjes, kufiri që ndanë Kosovën dhe Serbinë.
Ndërkaq, KFOR-i përmes një njoftimi ka bërë të ditur se ditët në vijim do të kryejë stërvitje të rregullta ushtarake në Novosellë.
Sipas një njoftimi për media, stërvitjet synojnë të trajnojnë njësitet e KFOR-it, për të garantuar lirinë e lëvizjes në kohë krizash dhe ‘konsistojnë në një seri të simulimeve taktike dhe aktiviteteve logjistike, përfshirë pajisje të rënda dhe helikopterë”.
Njoftimi për këto stërvitje vjen në kohën kur autoritetet e Kosovës bëjnë thirrje për heqjen e barrikadave të ngritura nga serbët lokalë në veri të Kosovës.
Barrikadat janë ngritur më 10 dhjetor në veri, si shenjë pakënaqësie ndaj arrestimit të ish-zyrtarit serb të Policisë së Kosovës, Dejan Pantiq.
Pantiq dyshohet se ka organizuar “sulm terrorist” në zyrat e Komisionit Qendror të Zgjedhjeve në veri të Kosovës. /Teve1.info/
