Autori: Adea Mustafaj
11 autobusë, që çdo ditë bëjnë rrugën Junik–Gjakovë-Pejë, qëndrojnë të parkuar që nga pasditja e së dielës në parkingun e kompanisë.
Pikërisht këtu, autobusat u dëmtuan dhe u thyen xhamat e tyre.
Nga ky incident shpëtoi vetëm një autobus, i cili nuk ndodhej në parking në atë moment.
Pronari i linjës, për Tëvë1, tregon se si e kuptuan për incidentin.
“Dje deri në ora 12:00 kemi qenë këtu bashk me vëllaun. Në orën 12:00 kena shku në shtëpi me pushu deri në orën 15:00 pas dite. Në orë 15:00 pas dite kur kena dal me punu i kena pa të gjitha xhamat e të gjithave autobusave të thyer ”, ka thënë Shehu.
Nga Policia e Pejës u tha se rasti është cilësuar si “Dëmtim prone”.
“Dje, rreth orës 15:10, policia është njoftuar për një rast në Junik. Ankuesi ka raportuar se në parkingun e kompanisë “Juniku Reisen” janë dëmtuar 11 autobusë. Nga prokurori i rastit, ngjarja është cilësuar si “Dëmtim prone”, kanë thënë nga policia.
Detaje për hetimin kanë dhënë edhe nga Prokuroria Themelore në Pejë.
“Në lidhje me këtë çështje ju njoftojmë se është raportuar tek prokurori kujdestar, i cili ka autorizuar Policinë e Kosovës dhe menjëherë kanë dalë në vendin e ngjarjes për shkak të dëmit të madh që është shkaktuar ndaj 11 autobusëve. Hetimin e ka marrë Drejtoria Rajonale e Hetimeve të Policisë së Kosovës në Pejë, të cilët janë duke ndërmarrë veprime hetimore për identifikimin e personit apo personave që e kanë kryer këtë vepër penale, si dhe për lokalizimin dhe arrestimin e tyre ”, është shprehur Nikçi.
Nga ky incident kompania pësoj dëme të cilat llogaritet të jenë rreth 50 mijë euro.
