Drejtori i Emergjencës, Naser Syla, ka thënë se 10 persona i kanë pranuar në emergjencë pas aksidentit zinxhirore ku janë përfshirë 14 vetura në Fushë Kosovë.
Syla për teve1 tha se nëntë prej tyre janë liruar për në shtëpi pas trajtimit mjekësor, ndërsa njëri nga ta është duke i bërë analizat.
“10 persona i kemi pranu në Emergjencë. 9 janë shku në shtëpi, pasi janë liru, njëri nga ta ka mbet me i kry analizat”, ka deklaruar ai.
Ndryshe, 14 automjete dhe disa persona janë lënduar nga aksidenti i rëndë që ka ndodhur mëngjesin e sotëm në autostradën “Ibrahim Rugova”, konkretisht në rrugën Mazgit – Bresje.
Për teve1.info zëdhënësi i Policisë së Kosovës, Daut Hoxha, ka bërë të ditur se kjo rrugë është bllokuar përkohësisht.
“Rreth orës 06:50 në autostradën Ibrahim Rugova, Mazgit-Bresje mbi urë te ETC-ja sipas informatave fillestare është shkaktuar një aksident trafiku zinxhiror ku janë të përfshira 14 automjete dhe si pasojë e aksdentit raportohet edhe për persona té lënduar”, tha Hoxha.
Në vendin e ngjarjes kanë dalë ekipet emergjente, të cilët sipas Hoxhës po merren me rastin dhe trajtimin e personave të lënduar.
“Përderisa njësitet policore dhe ekipet emergjente kane reaguar ne vendin e ngjarjes për tu marrë me rastin dhe trajtimin e personave të lënduar. Lidhur me detaje tjera do te njoftoheni pas raportimeve që do marrim nga ekipet ne teren”, deklaroi ai.
Tutje, zëdhënësi i Policisë apeloi për kujdes gjatë vozitjes gjatë kohës me ngrica dhe mjegull në mënyrë që të shmangen aksidentet e tilla./teve1.info/
