Nëpër shkollat fillore të Kosovës nga shkurti i vitit të kaluar me vaksinën kundër kancerit të qafës së mitrës (HPV), janë vaksinuar vetëm vajzat e moshës 11-12 vjeçare.
Por, që nga muaji i ardhshëm sivjet do të filloj vaksinimi edhe ndaj djemve të së njëjtës moshë.
Kjo u bë e ditur të mërkurën në një konferencë për medie nga Ministri i Shëndetësisë, Arben Vitia i cili tregoi se çfarë shkakton ky virus.
“Ky virus siç e dini shkakton shumë telashe dhe shumë lloje të kacereve dhe kanë qenë jashtëzakonisht problematike dhe barrë për sistemin tonë shëndetësor dhe me futjen e kalendarit e vaksinimit të kësaj vaksine kemi arritur që brezat e ardhshëm të jenë të sigurte në raport me këto sëmundje”, tha Vitia.
Ndërsa Drejtoresha e Instituti Kombëtar i Shëndetësisë Publike të Kosovës, Ardita Baraku tha se vaksina HPV është e sigurt dhe efikase në mbrojtjen nga disa lloje të sëmundjeve të kancerit.
“Vaksina kundër HPV është vaksinë e sigurte dhe është mjet efikas mbrojtës kundër disa llojeve të kacereve dhe sëmundjeve të tjera të cilat i prekin të dy gjinitë prandaj është e rëndësishme për të dy gjinitë. Po bëjë thirrje për prindër për arsimtarë por edhe për juve media që ta përçoni mesazhin për rëndësinë e vaksinimit në mënyrë që të vazhdohet ky trend i mirë i monizimit”, u shpreh Baraku.
Me këtë vaksinë e cila ka nis për vajzat nga viti i kaluar janë imunizuar 10 mijë vajza.
“Në 2024 në shkurt filluam vaksinimin e vajzave dhe filloi një fushatë në shkolla ka qenë një punë intensive jo vetëm e IKSHPK-së, por punë më e madhe është kryer në Institucionet e kujdesit parësor shëndetësor. Është një sukses i jashtëzakonshëm, janë 10 mijë vajza të vaksinuara deri në këtë moment dhe në 2025 kemi fillu me vaksinimin e djemve”, tha Fetije Fetaj, shefe e njësisë së vaksinimit në IKSHPK.
HPV është shkaktari kryesor i kancerit të qafës së mitrës i cili është kanceri i katërt më i shpeshtë te femrat.
