Ajo e pyetur nëse deklarata e kryeministrit Kurti, se Kosova rrezikohet nga një luftë prej Serbisë e nxitur nga Rusia, ka thënë se të gjithë e dinë përpjekjet e Rusisë për destabilizimin e rajonit përmes Serbisë.
Por, ajo ka thënë se parakusht për prurjen e investitorëve janë luftimi i korrupsionit dhe zhvillimi ekonomik, gjë për të cilën thotë se kanë perceptim të mirë nga investitorët potencial dhe ambasadat.
“Unë nuk dua të komentoj vlerësimet e tilla, investitorët dhe opinioni publik e ka shumë të qartë mënyrën se si po zhvillohen gjërat si me invazionin rus në Ukrainë, si me tentimin rus që ta destabilizojë rajonin përmes Serbisë. Kemi perceptim të mirë nga ana e investitorëve të huaj dhe ambasadorëve. Lufta kundër korrupsioni dhe zhvillimi ekonomik janë faktorët kryesorë që nxisin investitorët dhe në këtë drejtim jemi në rrugën e duhur”, ka thënë Rizvanolli të mërkurën në konferencë për medie pas mbledhjes së Qeverisë.
Ajo ka folur edhe për kërkesën që KESCO ka bërë në ZRrE për rritjen e çmimit të tarifave për energji, si pasojë e mos subvencionimit nga ana e Qeverisë.
Ministrja theksoi se subvencionimi do të ndodhë shumë shpejtë.
“Qeveria mbetët e përkushtuar të mbështesë qytetarët nga një rritje e papërballueshme e tarifave të energjisë. Javën e kaluar kemi marrë kërkesën nga ZRRE, ku është thënë se kalkulimet janë të sakta dhe është bërë kërkesa për pagim. Jemi në konsultim me Sekretarin e Komitetit të Energjisë dhe USAID që kanë ofruar mbështetje teknike për mënyrën e realizimit të marrëveshjes. Po punojmë intenzivisht e do të ndodhë shumë shpejt , tha ajo.
Qeveria në mbledhje ka ndarë edhe 40 milionë euro për pagesën e energjisë në veri, por Rizvanolli thotë se kjo nuk lidhet me mosrespektimin e udhërrëfyesit nga marrëveshja për energjinë nga ana e Serbisë.
Por që do të jetë vetëm për periudhën deri në tetor./teve1.info/
