Autore: Adea Mustafaj
Të dielën, pasi kishte hyrë nga Serbia në Kosovë, Ljubisa Milkoviçit iu vendosën prangat nga Policia e Kosovës, në Zveçan.
Kjo pasi që ai dyshohet për pjesëmarrje aktive në sulmin ndaj KFOR-it, Policisë së Kosovës dhegazetarëve më 29 maj 2023, para objektit të komunës në Zveçan.
Me vendim të prokurorit, i dyshuari është dërguar në mbajtje për 48 orë.
Ndërsa mëngjesin e kësaj të martës Milkoviç doli para Gjykatës Themelorë në Prishtinë.
Seanca dëgjimore për të u mbajt me dyer të mbyllura, ndërsa Gjykata Themelore në Prishtinë njoftoi se ndaj të dyshuarit është caktuar masa e paraburgimit prej 30 ditësh.
“Gjykata Themelore në Prishtinë, Departamenti Special ka aprovuar kërkesën e Prokurorisë Speciale të Republikës së Kosovës dhe përmes Aktvendimit ka caktuar masën e paraburgimit në kohëzgjatje prej një (1) muaji ndaj të pandehurit L.M., për shkak të dyshimit të bazuar se në bashkëkryerje ka kryer veprat penale Bashkimi për veprimtari kundër kushtetuese me qëllim të sulmit kundër rendit kushtetues të Republikës së Kosovës, Rrezikimi i personave nën mbrojtje ndërkombëtare, Sulmi ndaj personit zyrtar dhe Pjesëmarrja në turmë që kryen vepër penale dhe huliganizmi”, thuhet nga Gjykata Themelore në Prishtinë.
“Ljubisha Minkoviçit i është caktuar urdhëresa e gjykatës deri 30 ditë paraburgim. Kjo ka qenë e pritur nga momenti kur është burgosur. Dikush duhet të argëtohet me këtë që serbëve t’ju përcaktohet masa më e rëndë e paraburgimit, vetëm nga rreziku për ikje, më saktë nga fakti që kanë nënshtetësinë e Serbisë.Ia rikujtoj publikut që kjo lejohet me ligjet e Kosovës.Për këtë fakt, për shkak të kësaj mase të tepruar të paraburgimit, ekzistojnë gjithë ato marrëveshje për pranim të fajësisë në fund të fundit”, tha ai.
Më 29 maj të vitit 2023, 93 pjesëtarë të misionit paqeruajtës të NATO-s në Kosovë, KFOR, kishin pësuar lëndime, disa prej tyre lëndime të rënda pas përleshjes me protestuesit serbë.
Deri më tani, dy persona janë dënuar me burgim për shkak të dhunës ndaj KFOR-it.
Kurse, disa të tjerë kanë arritur marrëveshje me prokurorinë për pranimin e fajësisë për këtë rast.
