Të paktën tetë vende të tjera kanë thënë se janë ftuar nga Shtetet e Bashkuara që t’i bashkohen Bordit të Paqes të presidentit amerikan, Donald Trump, një organ i ri udhëheqësish botërorë që synon të mbikëqyrë hapat e mëtejshëm në Gaza.
Sipas një zyrtari amerikan që foli në kushte anonimiteti për Associated Press, një kontribut prej 1 miliard dollarësh siguron anëtarësim të përhershëm në bordin e udhëhequr nga Trump në vend të një emërimi tre-vjeçar, i cili nuk ka kërkesë për kontribut.
Sipas zyrtarit, paratë e mbledhura do të shkonin për rindërtimin e Gazës.
Njëri nga liderët evropian të ftuar për t’u bashkuar me bordin, e cili ka pranuar ftesën, është edhe kryeministri hungarez, Victor Orban, që njihet si një nga mbështetësit më të mëdhenjë të Trump në Evropë.
Edhe Kryetari i Partisë Komuniste të Vietnamit, To Lam, gjithashtu e ka pranuar, thuhet në një deklaratë të ministrisë së jashtme.
India ka marrë një ftesë, tha një zyrtar i lartë qeveritar me njohuri për çështjen, duke folur në kushte anonimiteti pasi informacioni nuk ishte bërë publik nga autoritetet.
Australia është ftuar dhe do ta diskutojë këtë me SHBA-në “për të kuptuar siç duhet se çfarë do të thotë kjo dhe çfarë përfshihet”, ka thënë zëvendëskryeministri Richard Marles për Australian Broadcasting Corp. të hënën.
Jordania, Greqia, Qiproja dhe Pakistani thanë të dielën se kishin marrë ftesa. Kanadaja, Turqia, Egjipti, Paraguai, Argjentina dhe Shqipëria kanë thënë tashmë se janë ftuar. Nuk ishte e qartë se sa veta janë ftuar gjithsej.
SHBA-të pritet të shpallin listën e tyre zyrtare të anëtarëve në ditët në vijim, me shumë mundësi gjatë takimit të Forumit Ekonomik Botëror në Davos të Zvicrës.
Shtëpia e Bardhë javën e kaluar njoftoi gjithashtu një komitet ekzekutiv udhëheqësish që do të zbatojnë vizionin e Bordit të Paqes, por Izraeli të shtunën kundërshtoi se komiteti “nuk ishte i koordinuar me Izraelin dhe është në kundërshtim me politikën e tij”, pa dhënë detaje.
Anëtarët e komitetit ekzekutiv përfshijnë Sekretarin e Shtetit të SHBA-së Rubio, të dërguarin e Trump, Steve Ëitkoff, dhëndrin e Trump, Jared Kushner, ish-kryeministrin britanik Tony Blair, Presidentin e Bankës Botërore, Ajay Banga, dhe zëvendëskëshilltarin e sigurisë kombëtare të Trump, Robert Gabriel, së bashku me një pronar biznesi izraelit, miliarderin Yakir Gabay.
