Ministrja e Punëve të Jashtme, Donika Gërvalla, ka kritikuar opozitën, e cila sot kërkoi që në Kuvend të diskutohet mbi themelimin e Komisionit Hetimor për nivelin e menaxhimit të marrëdhënies së punës të anëtarëve të Shërbimit të Jashtëm dhe të MPJD-së.
Gërvalla ka thënë se në ditën kur bashkë me kryeministrin e Kosovës, Albin Kurti janë nisur për Nju Jurk, atje ku do të mbahet Këshilli i Sigurimit i OKS-së, opozita pikërisht këtë ditë ka propozuar për shtyrje të pikës së rendit të ditës deri në seancën e ardhshme.
“Meqenëse detyra ime ma kërkon që sot të jem në Nju Jork dhe nga pamundësia që të jem e pranishme në atë seancë të Kuvendit, dua të përcjell mesazhin që jo vetëm që nuk i shmangem asnjë debati dhe asnjë hetimi, por mezi po pres që të flasim edhe për keqmenaxhimin e parasë publike edhe për punësimet e jashtëligjshme, familjarizmin dhe shkeljet konstante të ligjit në këtë ministri. Mezi po pres!”, ka shkruar ministrja në Facebook.
Ajo është deklaruar për emërimet e ambasadorëve, duke thënë se “ka vdekur koha e pazareve dhe emërimeve të ambasadorëve dhe konsujve nëpër kafene, telefonata të stilit pronto dhe në oda, të shpenzimeve marramendëse për udhëtime dhe hotele, të shitjes së pasaportave nëpër stacione trenash dhe pika karburanti, të sorollatjes me pasaporta dhe targa diplomatike dhe lloj-lloj malli nëpër ato vetura, të tonit harbut ndaj qytetarëve nëpër konsullata”.
Sipas saj, qytetarët meritojnë të dijnë se nga kush dhe si janë përfaqësuar vite me radhë jashtë Kosovës./teve1.info/
