Sipas një komunikate për medie nga IAP, konferenca këtë vit ka shqyrtuar rolin e institucioneve të Avokatit të Popullit para dhe gjatë konflikteve të armatosura, të drejtat dhe detyrimet e personelit të forcave të armatosura në kohë paqeje dhe rastet kur ato mbështesin zbatimin e ligjit.
“Veç të tjerash, gjatë Konferencës ishin paraparë sesione të veçanta për barazinë gjinore në forcat e armatosura; post -dislokimin dhe të drejtat shëndetësore, përfshirë shëndetin mendor të personelit të forcave të armatosura, si dhe për rolin e institucioneve të Avokatit të Popullit, përkitazi me OZHQ 16 -Paqe, drejtësi dhe Institucione të forta”, thuhet në njoftim.
Sipas komunikatës, një sesion special në këtë konferencë iu kushtua luftës në Ukrainë dhe rolit të Komisionerit Parlamentar për të Drejta të Njeriut atje.
Konferenca këtë vit po mbahet si bashkë organizim i DCAF – Qendra e Gjenevës për Qeverisjen e Sektorit të Sigurisë dhe Komisionit të Ombuds-it Parlamentar të Forcave të Armatosura të Norvegjisë.
