Stefan Gartenmann është njëri prej emrave të rinj në përfaqësuesen e Zvicrës në futboll. Gartenmann luan për Ferencvaroshin, është 28-vjeçar dhe paraqitet në mbrojtje. Është i lindur në Danimarkë, ka luajtur për grupmoshat prej U16 deri në U21 të Danimarkës. Ai ka pritur gjatë ftesën e Danimarkës A, por që nuk i erdhi.
Dhe tani do të luajë për Zvicrën. Ose ta paktën është i grumbulluar me Zvicrën A.
Ai e mori pasaportën zvicerane vetëm të martën e kaluar dhe kështu është në dispozicion të Murat Yakinit. Selektori i Zvicrës e ka përcjellë për një kohë dhe mori sinjalet nga Gartenmanni se është i gatshëm të paraqitet për “helvetikët”.
“Është ëndërr për mua. Gjyshi im ishte zviceran krenar, kështu që është e jashtëzakonshme për mua që të luaj për ekipin nacional”, ka thënë Gatermann për televizionin zviceran.
I pyetur për bashkëlojtarët e rinj, mbrojtësi ka thënë se i njeh si emra, por se nuk i ka takuar asnjëherë.
“Mendoj se sa i takon Danimarkës tashmë është e mbyllur. Jam 28-vjeçar dhe më duhet ta shfrytëzoj këtë mundësi. Nuk mund të pres për rast tjetër. Rastet si ky nuk vijnë dy herë”, ka thënë reprezentuesi i ri i Zvicrës.
Gartenmann shpreson që me Zvicrën të paraqitet në Kupën e Botës.
Në miqësoret me Irlandën e Veriut dhe Luksemburgun, Zvicra është pa Granit Xhakën e Ardon Jasharin.
Së fundi Zvicrës i janë lënduar Zeki Amdouni dhe Simon Sohm. Për shkak të mungesave të shumta rastin pritet ta fitojnë lojtarë të rinj.
