Dy ditë pas hedhjes së dy granatave të dorës në stacionin e Policisë në Zveçan, të enjten pas mesnatës persona të panjohur sulmuan me një granatë dore godinën e Komunës së Zveçanit ku si pasojë e shpërthimit u dëmtuan katër vetura dhe infrastruktura e objektit të Komunës. Kryetari i kësaj Komune, Ilir Peci tha se nuk frikësohen nga këto veprime siç i quajti të grupeve terroriste, ndërkaq zëvendës drejtori i Policisë për rajonin e veriut theksoi se janë duke punuar në ndriçim të rastit. Ministri i Punëve të Brendshme Xhelal Sveçla e ka quajtur dëshpërim të grupeve kriminale pasi që sipas tij, Policia e Kosovës po e lufton krimin në këtë zonë.
Zveçani ka dy ditë që nuk po gjen qetësi.
Kjo pasi që natën e së enjtes në këtë zonë u dëgjua përsëri një shpërthim me ç’rast u dëmtuan katër vetura.
Për pasojë u dëmtua dera e komunës, e xhamat e dritares së sallës ku mbahet mbledhja e kuvendit.
Megjithatë Kryetari i Zveçanit, Ilir Peci tha se nuk i frikësohet këtyre veprimeve siç i quajti ai, terroriste nga grupet kriminale që sipas tij tentojnë ngritjen e tensioneve.
“Një grup terrorist është duke i bërë këto gjëra para dy ditësh ka ndodhur këtu në stacionin e Policisë në komunën e Zveçanit, mbrëmë këtu do të thotë kjo është një grup e cila është duke tentuar për t’i frikësuar qytetarët serbë. Mirëpo unë shfrytëzoj rastin nga këtu t’iu kërkoj qytetarëve sidomos atyre serbë që të mos kenë frikë dhe të vazhdojnë me kërkesat e tyre”, tha Peci.
Peci shtoi se do të vazhdoi punën në përkrahjen e qytetarëve të komunitetit serbë.
E zëvendës drejtori i Policisë për rajonin e veriut, Veton Elshani deklaroi për hetimet që janë duke u zhvilluar në zbardhjen e rastit.
“Janë veprime policore hetimore që zhvillohen me këtë rast sikur me cdo rast tjetër sidoqoftë është duke u marrë shumë seriozisht sepse në fakt është rasti i dytë që ndodhi në Zveçan tek stacioni Policor edhe tash te komuna të gjitha hetimet policore janë duke u ndërmarrë atje ku na dërgojnë hetimet shkojmë edhe ne”, tha Elshani.
Elshani shtoi se këto raste janë të pritshme. Por reagimi i institucioneve është i menjëhershëm.
“Në fakt nuk është diçka që ne nuk e kemi parapa ose ka mundësi me ndodh një gjë e tillë, sikurse kjo që ka ndodhur tash ka mundësi të ndodhin edhe raste të tjera me rëndësi është se çfarë veprime merr policia”, tha ai.
Gjatë ditës për këtë rast reagoi edhe ministri i Punëve të Brendshme, Xhelal Sveçla i cili në shkrimin e tij në rrjetin social Facebook ka thënë se këto veprime janë të dirigjuara nga Beogradi.
“Sulmet e ditëve të fundit ndaj institucioneve në veri janë shprehje e dëshpërimit dhe qyqarllëkut të bandave kriminale me dirigjim nga Beogradi. Në kohën kur po çmontohen ditë e më shumë, dëshpërimisht duan të tregojnë se ende janë këtu dhe të fortë. Por, ne jemi më të vendosur se kurrë deri në eliminimin e plotë të secilës grimcë kriminale e terroriste në vendin tonë”, ka shkruar Sveçla në Facebook.
Sulm i ngjashëm ndodhi para dy ditësh ndaj stacionit policor në Zveçan, ku u hodhën dy granata dore.
E ndërkohë, Tëvë1 ka siguruar pamjet e këtij sulmi.
