Zëvendëskryeministri dhe ministri i Zhvillimit Ekonomik në Mal të Zi, Nik Gjeloshaj, do të vizitojë Kosovën me rastin e shënimit të Ditës së Pavarësisë.
Ky vendim është marrë në mbledhjen e qeverisë malazeze më 14 shkurt, teksa Gjeloshaj ka thënë se me këtë rast është aprovuar platforma që ai ta vizitojë Kosovën dhe të marrë pjesë në kremtimin e Ditës së Pavarësisë së Kosovës.
“Mali i Zi e ka njohur pavarësinë dhe vazhdon të ketë bashkëpunim shtetëror me Kosovën. Në emër të Qeverisë së Malit të Zi do t’ua uroj 16 vjetorin e Pavarësisë drejtuesve dhe qytetarëve të Republikës së Kosovës. Kjo konfirmon vazhdimin e bashkëpunimit të ngushtë dhe marrëdhënieve të mira fqinjësore midis dy shteteve”, ka shkruar Gjeloshaj në Facebook.
Njëherit, ai ka njoftuar se ftesa për pjesëmarrje në këtë solemnitet është dërguar nga presidentja e vendit, Vjosa Osmani, kryeministri, Albin Kurti dhe Kryetari i Kuvendit, Glauk Konjufca./teve1.info/.