Zyra e Rregullatorit për Energji (ZRRE) ka sqaruar se KOSTT, KEDS dhe KESCO kanë paraqitur kërkesat për përshtatjen e të hyrave të lejuara për vitin 2025, të cilat siç thuhet janë dorëzuar në ZRRE në përputhje me kërkesat ligjore.
Sipas ZRRE-së përgjigja e tyre ndaj këtyre aplikimeve do të bazohet në një vlerësim të detajuar të dokumenteve të dorëzuara dhe pas përfundimit të vlerësimit do të hartojnë dhe publikojnë një raport për konsultim publik.
Në këtë raport thuhet se do të përfshihen analizat dhe rekomandimet përkatëse dhe raporti do të jetë i disponueshëm për konsultim për një periudhë dyjavore, gjatë së cilës bëhet e ditur se qytetarët dhe palët e interesuara mund të shprehin komentet dhe sugjerimet e tyre.
“Pas shqyrtimit të komenteve dhe sugjerimeve të marra gjatë periudhës së konsultimit, ZRRE-ja do të propozojë një vlerësim përfundimtar, i cili do të dorëzohet për miratim në Bordin e ZRRE-së. Ky proces është projektuar për të siguruar transparencë të plotë dhe për të mundësuar pjesëmarrjen e publikut dhe aktorëve të tjerë të interesuar në këtë proces të rëndësishëm”, thuhet në sqarim.
Më tej thuhet se deri në publikimin e raportit për konsultim publik, ZRRE-ja nuk mund të japë asnjë qëndrim për mundësinë e ndryshimeve të tarifave të energjisë elektrike për vitin 2025.
Po ashtu thuhet se çdo spekulim lidhur me rritjen e tarifave, para se të publikohet raporti i ZRRE-së për konsultim publik, është i pavërtetë, i paargumentuar dhe nuk duhet të merret parasysh.
“Ftohen të gjithë qytetarët dhe palët e interesuara që të ndjekin raportet dhe informacionet e publikuara nga ZRRE dhe të kontribuojnë me komentet e tyre gjatë periudhës së konsultimit publik. Kjo është një mundësi për të siguruar që çdo ndryshim në strukturën e tarifave të energjisë të jetë i bazuar në një analizë të thellë dhe të marrë parasysh interesat e të gjithë konsumatorëve”, theksohet në sqarim.
