Në komisionin e ekonomisë, ku pritej të raportonte Bordi i Zyrës së Rregullatorit të Energjisë (ZRRE), u tha se të njëjtit nuk iu përgjigjën pozitivisht mbledhjes, porse shkuan në zyrën e Lëvizjes Vetëvendosje në Kuvend.
Kjo deklaratë erdhi pas dështimit të mbledhjes së komisionit, e cila dështoi për shkak të mungesës së kuorumit.
Ata që nuk morën pjesë ishin anëtarët e Lëvizjes Vetëvendosje.
E, nga ZRRE, në kushte anonimiteti kanë thënë për KosovaPress se ishin në Kuvend porse nuk kanë shkuar në katin e zyrave të partive.
“Ne ishim të gatshëm të marrin pjesë dhe të raportonin por kjo mbledhje dështoi shkaku i kuorumit”, ka thënë personi në fjalë.
Sipas të njëjtit, bordi i ZRRE-së është i gatshëm të reagojë kurdo.
KosovaPress ka kontaktuar edhe tre anëtarë të komisionit nga Lëvizja Vetëvendosje, përfshirë kryesuesen e Komisionit për ekonomi, Rozeta Hajdarin por të njëjtit nuk pranuan të përgjigjen lidhur me këtë çështje, duke thënë se janë të ngarkuar me punë.
