Zyra e Rregullatorit për Energji (ZRRE) ka thënë se vendimi për rritjen e tarifave të energjisë elektrike 16.1 për qind nuk do të përfshijë konsumatorët në katër komunat veriore të Kosovës (Leposaviq, Zveçan, Zubin Potok dhe pjesë të Mitrovicës Veriore).
Kjo pasi sipas tyre, ata furnizohen nga kompania Elektrosever.
“Zyra e Rregullatorit për Energji (ZRRE), në përputhje me mandatin dhe përgjegjësitë e saj ligjore, sqaron se vendimi i Bordit të ZRRE-së i datës 16 prill 2025, për miratimin e tarifave të reja të energjisë elektrike, zbatohet vetëm për Furnizuesin me Shërbim Universal, që aktualisht është Kompania Kosovare për Furnizim me Energji Elektrike (KESCO)… Elektrosever është furnizues i licencuar nga ZRRE për të operuar në atë pjesë të territorit, mirëpo nuk është Furnizues me Shërbim Universal dhe si rrjedhojë, ZRRE nuk përcakton tarifat përfundimtare për konsumatorët që furnizohen nga kjo kompani. ZRRE-ja përcakton tarifat për përdorimin e rrjeteve të transmetimit dhe shpërndarjes që janë të zbatueshme për të gjithë operatorët e licencuar, përfshirë edhe Elektrosever-in”, thuhet në përgjigje për Tëvë1.
Tutje, thuhet se ky operator është i obliguar të paguajë tarifat për shfrytëzimin e këtyre rrjeteve, sipas vendimeve të miratuara nga Bordi i ZRRE-së.
Megjithatë, sipas tyre tarifat që Elektrosever u aplikon konsumatorëve të saj janë në kompetencën e vetë kësaj kompanie dhe nuk përcaktohen nga ZRRE-ja.
“Në këtë kontekst, theksojmë se diferencimi ne tarifa rrjedh nga dallimet në strukturën e furnizuesve dhe përgjegjësive që ata mbajnë sipas licencave të tyre përkatëse”, thuhet në përgjigje.
