Kryetari i bordit të ZRrE-së, Ymer Fejzullahu ka bërë të ditur se është ulur për rreth 4 për qind tarifa për ata që ngrohen nga Termokosi në Prishtinë dhe rreth 5% tarifa e ngrohjes në Gjakovë.
Fejzullahu ka kërkuar nga qytetarët që të kursejnë sa më shumë energjinë elektrike pasi siç u shpreh është rritur importi gjatë muajve të fundit.
Zyra e Rregullatorit të Energjisë Elektrike ka mbajtur mbajtur mbledhjen e radhës ku ka miratuar të hyrat e lejuara maksimale për Termokosin. Në bazë të këtyre të hyrave u bë e ditur se nuk do të ketë ngritje të tarifave për vitin 2026 për qytetaret që ngrohen nga ‘Termokosi’ në Prishtinë.
“Gjatë kësaj seance Bordi ka shqyrtuar dhe miratuar të Hyrat e Lejuara Maksimale për ndërmarrjen NQ Termokos sh.a dhe për ndërmjarrjen NQ Gjakova sh.a për sezonin e ngrohjes 2025/2026. Është bërë edhe shqyrtimi dhe miratimi i tarifave të energjisë termike për konsumatorët fundorë të NQ Termokos sh.a dhe NQ Gjakova sh.a për sezonin e ngrohjes 2025/2026. Tarifat me matje për NQ Termokos sh.a janë zbritur për rreth 4% ndërsa për NQ Gjakova sh.a për rreth 5%”, thuhet nga ZRrE.
Në këtë seancë, Bordi ka miratuar Aneks-Marrëveshjen ndërmjet Korporatës Energjetike të Kosovës KEK dhe Termokos sh.a për çmimin e energjisë termike nga kogjenerimi në TC Kosova B.
Pjesë e shqyrtimit nga Bordi kanë qene edhe ankesat e konsumatorëve dhe çështje të tjera që lidhen me menaxhimin dhe funksionimin e Zyrës së Rregullatorit për Energji.
