Nëpërmjet një shkrese të Zyrës së Prokurorit të Specializuar (ZPS), janë dhënë informacione rreth deklaratave që Rexhep Selimi, Jakup Krasniqi dhe Kadri Veseli, kishin dhënë në cilësi të të dyshuarve dhe të dëshmitarëve.
Sipas ZPS-së, Selimi kishte dëshmuar për anëtarësimin e tij në Ushtrinë Çlirimtare të Kosovës, përfshirjen në Departamentin Operativ të UÇK-së dhe marrëdhëniet me anëtarët e Shtabit, raporton Betimi për Drejtësi.
ZPS-ja njoftoi se Selimi kishte folur edhe për ngritjen e zonave operative, Policinë Ushtarake të UÇK-së, rolin e tij si ministër i rendit dhe veprime të tjera brenda ushtrisë.
Ndërsa, në dëshminë e tij, Jakup Krasniqi ka folur për strukturën e UÇK-së, marrëdhënien e tij me anëtarët e Shtabit, lëvizjet e tij jashtë Kosovës, negociatat e Rambujesë dhe “njohuritë e tij për arrestimet dhe ndalimet në Likoc”.
Ndërsa, më 13 shtator 2010 dhe 3 maj 2011, Kadri Veseli u tha se ishte dëshmitar në hetimin e PSRK-së ndaj Nazim Bllacës.
“Ai ishte informuar se ishte dëshmitar, se duhej të thoshte të vërtetën dhe se nuk duhej t’i përgjigjej pyetjeve që do ta ekspozonin ndaj ndjekjes penale. Ai konfirmoi se i kuptonte të drejtat dhe detyrimet e tij. Më pas Veseli iu përgjigj pyetjeve dhe ofroi dëshmitë që ndërlidhen me (i) pozitat e tij brenda UÇK-së dhe PGoK-së; (ii) udhëheqjen e tij të SHIK-ut, organizatën e tij, dhe rolin e tij në mbledhjen e informacioneve për ‘armikun’; dhe (iii) strategjitë për të zbuluar ‘bashkëpunëtorët’”, thuhet në shkresë.
Gjithashtu, thuhet se më 26 shtator 2011, Veseli ishte dëshmitar në rastin hetimor të PSRK-së kundër Arben Krasniqit, e në dëshmi kishte folur edhe për “Operacionin Shigjeta” dhe ndërveprimet ndërmjet “Fatmir Limajt, Azem Sylës, Jakup Krasniqit, Hashim Thaçit, Xhavit Halitit, Bislim Zyrapit, Agim Çekut dhe Ramë Bujës”.
Më 13 dhe 14 janar 2020, thuhet se ZPS-ja zhvilloi një intervistë me të dyshuarin e atëhershëm Hashim Thaçi.
Thaçi u tha se ishte informuar se kishte një hetim penal dhe se kishte bazë për të besuar se ai kishte qenë i përfshirë në kryerjen e një krimi brenda juridiksionit të DhSK-së.
Sipas shkresës, atij iu tha se kishte të drejtë të heshte, por nëse do të bënte një deklaratë, pyetja do të regjistrohej në tërësi dhe mund të përdorej si provë.
“Thaçi ofroi dëshmi për ngjarjet që kanë të bëjnë me akuzat, duke përfshirë, por pa u kufizuar në: (i) anëtarësimin e tij në UÇK; (ii) përfshirjen dhe udhëheqjen e tij në Drejtorinë Politike dhe Informative të UÇK-së; (iii) vendndodhjen dhe vendndodhjen e tij të anëtarëve dhe udhëheqësve të tjerë të UÇK-së”, u tha në njoftim.
