Pas arrestimit të ish-deputetit Haxhi Shala, Zyra e Prokurorit të Specializuar (ZPS) bën të ditur se ai do të paraqitet para gjykatësit pa vonesa.
Sipas ZPS-së, fletarrestimi i Shalës lidhet me krime kundër administrimit të drejtësisë, raporton teve1.info
“Ai është transferuar në Objektin e Paraburgimit të Dhomave të Specializuara të Kosovës në Hagë dhe do të dalë para Gjykatësit të Procedurës Paraprake të Dhomave të Specializuara të Kosovës pa vonesa të panevojshme. Fletarrestimi lidhet me krime kundër administrimit të drejtësisë”, thuhet në njoftim.
Tutje shtohet se ZPS-ja “e merr jashtëzakonisht seriozisht pengimin e drejtësisë dhe do të vazhdojë të hetojë e ndjekë penalisht cilindo dhe të gjithë ata që përfshihen në çdo rast, përfshirë ata që frikësojnë apo ndërhyjnë tek dëshmitarët, ose ofrojnë mbështetje financiare apo të ndonjë forme tjetër për vepra të tilla penale”.
Ish-komandanti i UÇK-së, Haxhi Shala është shoqëruar për në selinë e EULEX-it mëngjesin e së hënës. Teksa avokati i tij, Xhevdet Smakiqi ka konfirmuar se Shala është dërguar në Gjykatën Speciale në Hagë. /Teve1.info/
