Zoran Vukotiq është dënuar me 15 vite burgim për krime lufte në Kosovë.
Vendimi është marrë të martën nga trupi gjykues, raporton Tëvë1.
Vukotiq akuzohej se ka marrë pjesë si zyrtar policor, në vrasje, dhunime seksuale, keqtrajtime, dhe veprime tjera çnjerëzore ndaj popullatës civile gjatë luftës së fundit në Kosovë.
Në këtë dënim nuk përfshihet dhunimi seksual, pasi sipas Gjykatës kjo akuzë nuk është vërtetuar përgjatë gjykimit.
Në aktakuzën e parë, të cilën Prokuroria Speciale e ka ngritur më 20 prill 2017, Zoran Vukotiq ngarkohej se në mes të datave 2 dhe 3 maj 1999, si zyrtar policor rezervist nga stacioni policor në Vushtrri, në bashkëpunim me persona të tjerë nga radhët e forcave serbe, ka marrë pjesë në sulmin ndaj popullatës civile shqiptare.
Sipas kësaj aktakuze, thuhet se gjatë kësaj kohe, popullata civile në mënyrë të qëllimshme u është nënshtruar vrasjeve brutale dhe të paligjshme, trajtimit johuman, vuajtjeve të pafundme, dëbimit, si dhe aplikimit të masave të terrorit.
Bazuar në aktakuzë, në mesin e këtyre civilëve të vrarë, plagosur dhe të trajtuar në mënyrë johumane për çfarë i pandehuri Zoran Vukotiq mban përgjegjësi, janë: Ekrem Mullaku, Xhavit Mullaku, Fatmir (Ahmet) Gërxhaliu, Eshref Rashica, Adnan Bunjaku, Rrahmon Ademi, një 14 vjeçar i paindentifikuar, Haki Ademi, Shaip Gërxhaliu, Musa Gërxhaliu, Bajram Gërxhaliu, Bahrije Gërxhaliu dhe Avdi Gërxhaliu.
