Nënkryetari i Prishtinës, Alban Zogaj ka deklaruar se tashmë është nënshkruar kontrata për fillimin e punëve në rrugën A në kryeqytet dhe se të gjitha procedurat kanë përfunduar.
Zogaj në Tëvë1, tha se kjo rrugë është e përmasave gjigante cila siç tha ai do t’iu ofrojë jo vetëm qytetarëve të Prishtinës por edhe vizitorëve një transit që e lidh Prishtinën e Re me Veternikun dhe Bregun e Diellit.
“Veç se e kemi nënshkruar kontratën për fillimin e punëve në rrugën A, pra kanë përfunduar të gjitha procedurat dhe jemi në momentin kur veç se ne fillojmë me punën në rrugën A. Rruga A është një projekt strategjik i kryeqytetit pra është një rrugë e përmasave të mëdha, e përmasave të rrugës B që lidhet me rrugën B dhe do ti ofrojë qytetarëve të Prishtinës, por jo vetëm edhe atyre që e vizitojnë Prishtinën, një tranzit të jashtëzakonshëm që e lidh Prishtinën e Re, lagjen e Veternikut me Bregun e Diellit. Shumë qytetarë të Prishtinës nuk kanë nevojë më me hy te rrethi me hy në Ulpianë, për me vazhdu tutje në Breg të Diellit, por kanë me përdorë këtë rrugë të re e cila është rrugë e gjanë me shumë korsi, me shtigje të biçikletave, me trotuare, me ndriqim publik. Pra një rrugë e nivelit të autostradave edhe çmimi i ndërtimit të saj është çmim serioz dhe ne konsiderojmë që kjo është prej punëve të mëdha që po fillon dhe ne jemi krenarë për këtë.”, tha ai.
Tutje Zogaj në emisionin “Ditari”, tha se projekti në fjalë do të kap vlerën prej afro nëntë milionë euro dhe pritet të përfundojë gjatë ketij viti.
“Ky projekt do të kushtojë afër nëntë milionë euro, pra pjesa e parë e rrugës A që përfundohet gjatë vitit 2023 sipas parashikimeve tona. Është kontraktu një kompani e cila ka me përfundu fazën e parë të rrugës A, pastaj jemi në projektim që me vazhdu edhe me fazën e dytë të rrugës A. Sepse rruga A pastaj del në anën tjetër te kompleksi i ndërtesave që i quajmë “ndërtesat e arapve” në Emshir e vazhdon deri te hoteli Garden e tutje dhe lidhet me rrugën e Fushë Kosovës pra është rrugë gjinte.Tash fillojmë prej Spitalit amerikan deri te lidhja me rrugën B te barnatoret dhe kjo është faza e parë. Faza e dytë pastaj e prenë Veternikun pra hyjmë nën nënkalim dhe dalim në Emshir e tutje deri te hoteli Garden dhe lidhemi me rrugën e Fushë Kosovës. Kjo është një linjë fantastike është një rrugë strategjike e kryeqytetit”, tha Zogaj.
Teksa sa i përket fillimit të punimeve sipas nënkryetarit Zogaj, pritet që ato të fillojnë javën e ardhshme ku edhe pritet të bëhet promovimi.
“Ne mendojmë javën e ardhshme ta bëjmë promovimin, ku bagerët e parë veç kanë me fillu me punë. Fillohet me kolektor sepse aty kalon një kanalizim për të cilin janë anku gjithmonë qytetarët e Prishtinës, fillojmë me ndërtimin e kolektorit që së pari të futet në gyp krejt ai ujë që rrjedhë në atë pjesë përmbi kolektor ndërtohet rruga “, shtoi ai./teve1.info./
