Deputeti i Lidhjes Demokratike të Kosovës, Alban Zogaj, ka thënë se për këtë subjekt politik intervistimi i zëvendëskryeministrit në detyrë, Besnik Bislimi nuk ishte i befasishëm.
Zogaj në emisionin “Ditari” në Tëvë1 është shprehur kështu pasi sipas tij LDK-ja e ka ditur gjithmonë se kjo qeverisje ka qenë e korruptuar.
“Të them të drejtën për ne nuk ishte edhe ndonjë lajm i befasishëm, sepse në vazhdimësi e kemi thënë e kemi theksuar që kjo qeverisje përveç që është e paaftë është edhe qeverisje e korruptuar dhe me shumë afera korruptive. Secili prej tyre një nga një po intervistohen nga Prokuroria Speciale për shumë raste , në mesin e tyre është edhe kryeministri në detyrë Albin Kurti, por që nuk shkon t’i përgjigjet”, ka thënë ai.
Ndërkaq, akuza e Bislimit ndaj Prokurorisë Speciale pas përfundimit të intervistimit të tij, Zogaj ka thënë se është e papranueshme dhe sulm ndaj vetvetes.
“Pastaj, pas intervistimit dalin dhe i sulmojnë institucionet e vendit të tyre që për ne është totalisht e papranueshme. Nuk mundesh me dal nga intervistimi dhe me i sulmu institucionet e pavarura të vendit tënd, sepse po e sulmon vetveten. Zëvendëskryeministri e sulmon Prokurorinë, kryeministri e sulmon të njëjtën ose në raste të tjera Gjykatën Kushtetuese, kur i konvenon thotë janë të mirë dhe po e kryejnë punën mirë, kur nuk i konvenon janë armiq të partisë së tyre e kështu me rradhë dhe këto janë sjellje jo serioze dhe të papranueshme në një shtet demokratik”, ka shtuar Zogaj.
Ndryshe, zëvendëskryeministri në detyrë i Kosovës, Besnik Bislimi, të mërkurën është intervistuar nga Prokuroria Speciale e Kosovës, në cilësinë e dëshmitarit, për rastin që ka të bëjë me hetimet mbi dyshimet për dhënien me qira të fabrikës për mbetje shtazore.
Pas përfundimit të intervistimit, Bislimi përmes një postimi në Facebook, ka akuzuar Prokurorinë se me këtë intervistim ka dashur që të bëjë bujë mediale.
“Nisur nga fakti se hyrja e ndërtesës ku u mbajt intervista ishte vërshuar nga portalet, gjë që nuk ndodh më raste të tjera kur ftohen dëshmitarët, dhe nga përvoja e nxjerrjes në media të lajmit për intervistim saktësisht kur po zhvillohej takimi trilateral i dialogut në Bruksel, del i pashmangshëm përfundimi se qëllimi parësor i kësaj interviste ka qenë prodhimi i lajmit medial, ku eksponentë të qeverisë bëhen pjesë e titujve bashkë me termin “skandal”. “Skandal” që origjinën nuk e ka as në Ministri të linjës e as në prokurori, por te eksponentë të medias. Kjo e vendosë prokurorinë në një perspektivë jashtëzakonisht negative karshi përgjegjësive që ka dhe orientimit që ka zgjedhur të ndjekë. Do të ishte me interes të shumëfishtë që kjo qasje të rishikohet”, ka shkruar Bislimi.
