Në kuadër të zbatimit të Planit Vjetor të Auditimit 2024/2025, Zyra Kombëtare e Auditimit (ZKA) ka filluar auditimin e performancës me temën “Fuqizimi i rolit të grave në udhëheqje dhe marrje të vendimeve”.
Ky auditim po realizohet në bashkëpunim me Kontrollin e Lartë të Shtetit të Shqipërisë dhe Zyrën e Revizionit të Maqedonisë së Veriut, me mbështetjen e UN Women.
Sipas njoftimit të ZKA-së, auditimi do të përfshijë institucionet kryesore përgjegjëse për menaxhimin e burimeve njerëzore dhe do të shqyrtojë përfshirjen e indikatorit gjinor në pozitat vendimmarrëse brenda administratës shtetërore.
“Subjekt i auditimit do të jenë Agjencia për Barazi Gjinore, Këshilli i Pavarur Mbikëqyrës i Shërbimit Civil, Ministria e Punëve të Brendshme, përkatësisht Departamenti për Menaxhimin e Zyrtarëve Publikë dhe Departamenti për Reformat e Administratës Publike”, thuhet në njoftim.
ZKA bën të ditur se auditimi synon të vlerësojë nëse institucionet përgjegjëse kanë ndërmarrë hapa konkretë për realizimin e objektivave strategjike globale të Bashkimit Evropian, përkatësisht objektivit të pestë strategjik, i cili synon krijimin e kushteve dhe qasjes së barabartë për të gjitha gratë dhe vajzat.
Auditimi do të analizojë masat e ndërmarra dhe efektin e tyre në rritjen e pjesëmarrjes, sigurimin e mundësive dhe përfaqësimin e barabartë gjinor në pozitat drejtuese.
Sipas të dhënave statistikore të cituara nga ZKA, administrata shtetërore ende nuk ka arritur balancim gjinor në pozitat udhëheqëse.
Gratë mbeten të nënpërfaqësuara në mënyrë të konsiderueshme krahasuar me burrat në pozitat vendimmarrëse të nivelit të ulët, të mesëm dhe të lartë.
Edhe pse gratë përbëjnë rreth 42 për qind të të punësuarve në administratën publike, ato zënë vetëm 20 deri në 25 për qind të pozicioneve drejtuese.
