Ky telefon nuk iu pushon as në natën e ndërrimit të moteve.
E për këtë arsye zjarrfikësit duhet të jenë gjithnjë në dispozicion.
Kësaj radhe ky ndërrim ka fatin të jetë në punë atë natë.
Por sa e vështirë është të jesh në krye të detyrës në natën e vitit të ri tregon udhëheqësi i këtij ndërrimi, Behar Shala.
“Kështu që ne këtë vit e kemi shortin për natën e Vitit të Ri të jemi në punë. Nuk e kam numëru por besoj që më ka rënë një 4 5 herë ndoshta edhe 6 por për neve është një punë e rëndomtë të cilën ne e llogaritim që jemi në punë ku më se keqti ndjehemi para fëmijëve para familjes sonë kur fëmijët na thonë a prapë po të bie në festë me qenë në punë”, thotë Behar Shala, zjarrfikës.
Por për këtë, zjarrfikësit në Prishtinë paguhen shtesë gjë që nuk ndodhë në komunat tjera.
“Shërbimi i zjarrfikësve punën në 24/7 dhe është e pamundur pa e prek një ndërrim, festat zyrtare apo fetare. Mirëpo ajo që është edhe më e mirë për Komunën e Prishtinës ose për zjarrfikësit, është që neve këto orë na paguhen, për fat të keq komunave tjera nuk ju paguhen që ne ndjejmë keqardhje dhe solidarizohemi me ta”, thotë ai.
Këto pagesa ua lehtësojnë punën gjatë festave.
“Që nga janari prej vitit 2023 me vendim të Kryetarit Përparim Rama janë paguar tri llojet e kategorive të shtesave. Ato janë orët e natës, orët e festave zyrtare dhe orët jashtë orarit të rregullt. Që nga për shkak të mungesës së njerëzve sidomos në situatat e verës na është duhur të angazhojmë staf shtesë për shkak të mungesës së punëtorëve që kemi”, tregon Malë Gashi, Komandant i brigadës së zjarrfikësve.
Sipas tij, këtë vit ka pasur më pak intervenime se sa vitin e kaluar, që kishte shënuar numrin më të madh të intervenimeve ndonjëherë.
Vitin e kaluar ka qenë viti më i madh i intervenimeve që kemi pas ndonjëherë që kanë qenë 2367 intervenime ndërsa deri tani i kemi mbi 2200 është një diferencë shumë e vogël por kemi më pak se vitin e kaluar”, thotë Gashi.
Kushtet e punës dhe paga vazhdojnë të jenë pakënaqësi për zjarrfikësit.
Por ata presin që viti 2025, ti gjejë me kushte më të mira.
