Janë ditët e para të punës në teren.
E ndonëse akoma nuk kanë kryer ndonjë trajnim për të kryer operacionet e fikjes së zjarrit, këta zjarrfikës po angazhohen maksimalisht në shuarjen e flakëve.
Ky angazhim erdhi për shkak të situatës serioze me zjarre ditët e fundit.
Por, komandanti i brigadës së zjarrfikësve thotë që aftësimin profesional për këtë do e marrin javën që vjen 28 zjarrfikësit e rinj që i janë shtuar Brigadës së Zjarrfikësve.
“Me hapjen e konkursit dhe me pranimin e zjarrfikësve të rinj, që 28 kanë fillu, 9 na janë bashkëngjitë neve këtu në punë, ajo sigurisht na ka lehtësu shumë punën. Po shpresojmë edhe me kryerjen e trajnimit që e fillojnë javën e ardhshme e që e kanë dy javë do të jenë të gatshëm për operim në operacionet e zjarrfikjes dhe shpëtimit”, ka deklaruar komandanti i Brigadës, Malë Gashi.
Megjithatë sipas ekspertëve të emergjencave, ky numër nuk mjafton për të mbuluar gjithë vendin.
“Kjo nuk do të thotë që i plotësojnë kushtet për shkak të numrit të banorëve për aq sa është e nevojshme. Mirëpo kjo sadopak do të përmirësojë gjendjen në mënyrë që ata të intervenojnë sepse zjarrfikësit janë reaguesit e parë dhe ata duhet të qoftë në fatkeqësi të ndryshme qoftë në fatkeqësi natyrore”, ka thënë eksperti i emergjencave, Tahir Ahmeti.
Në ditët e fundit, zjarrfikësit kanë intervenuar për fikjen e rreth 300 rasteve të përhapjes së zjarrit në gjithë Kosovën.
Ndihmë këtyre i kanë dalur edhe vullnetarët.
