Kryetari i Sindikatës së Zjarrfikësve, Muharrem Beka, tha se shërbimit të zjarrfikësve i janë akumuluar problemet që shumë vite.
Beka, tha se zjarrfikësit kanë probleme prej pasluftës, ku prej atëherë nuk është marrë askush me ta.
“Shërbimi i zjarrfikësve dhe shpëtimit në Kosovë janë në një gjendje të palakmueshme, e paqartë e padefinuar, me shumë probleme të akomulara ndër vite, ky problem daton qysh prej vitit 2011/12, në fakt problemet kanë qenë evidente qysh prej pasluftës, askush nuk është marrë me këtë shërbim, është shumë interesant, një shërbim kaq i rëndësishëm për shoqëri dhe të lihet kështu pas dore kjo është e pa pranueshme”, tha ai në emisionin “Ditari” në Tëvë1.
Beka, thotë se gjendja e zjarrfikësve është e njëjtë qysh prej vitit 2019, atëherë kur edhe Qeverisë i është drejtuar me një kërkesë, ku i ka shpalosur të gjitha ankesat e zjarrfikësve.
“Të gjitha problemet janë njësoj, asnjë hap para nuk është bërë, veç asaj të rrezikshmërisë. Ne ju kemi drejtuar të gjitha qeverive pa dallim. Edhe qeveria e fundit i dinë të gjitha problemet tona, na kanë takuar, i kemi njoftuar me shkresa, kemi caktuar edhe data për protesta. Protestat janë anuluar me zotimin që kërkesat tona do të plotësohen. Këto kanë ndodhur më 2021 në nëntor”, tha ai.
Beka, ka paralajmëruar që në muajin shtator do të ketë protesta, pasi që siç tha ai zjarrfikësit kanë pritur mjaftë dhe kanë humbur durimin.
“Ne do të ju drejtohemi të gjitha instancave, do të duhet të bëhet një zgjidhje, mjaftë është pritë, zjarrfikësit e kanë humbur durimin, nuk do të pritet fundi i shtatorit. Jemi duke u konsoliduar me shoqata dhe në momentin që nuk na takojnë…, të bëhet një zgjidhje. Zjarrfikësit nuk do të tolerojnë më, iu kanë shtjerë mundësitë për dialog, atëherë le të dalin institucionet tona dhe le të ju tregojnë zjarrfikësve në protestë pse kjo gjendje është kështu. Është e pakuptimtë, e papranueshme!”, shtoi ai./teve1.info/
