Policia e Kosovës u ka bërë thirrje qytetarëve që të qëndrojnë vigjilent ndaj rrethanave aktuale që ndërlidhen me zjarret.
Përmes komunikatës kanë kërkuar që ata t’iu përmbahhen udhëzimeve të sigurisë nga zjarri të shpërndara nga policia dhe mekanizmat e tjerë, të raportojnë menjëherë çdo aktivitet të dyshimtë si dhe në të njëjtën kohë të shmangin veprimet ose aktivitetet të cilat mund të shkaktojnë zjarr.
Në njoftim po ashtu thuhet se Policia e ka trajtuar me kujdes të shtuar situatën e ditëve të fundit duke reaguar shpejt, duke dalë në vendet e zjarrit për të ndihmuar evakuimin, kontrollin e trafikut si dhe sigurinë përreth.
“Ka kryer vizita në zonat e prekura për të ofruar informacion dhe mbështetje për banorët. Kemi punuar ngushtë dhe jemi koordinuar me agjencinë për menaxhimin e emergjencave, shërbimet zjarrfikëse, shërbimet e urgjencës mjekësore, drejtoritë komunale të emergjencave dhe agjencitë e tjera përkatëse, në ndarjen e informacioneve dhe burimeve në kohë reale dhe veprimeve të vazhdueshme për të frenuar përhapjen e zjarreve dhe për të minimizuar dëmet”, thuhet në komunikatë.
Më tej thuhet se disa nga këto incidente mund ti atribuohen kushteve klimatike, disa për shkaqe aksidentale por që janë ndjekur të gjitha pistat për të hetuar dhe përcaktuar nëse ndonjë zjarr është vënë qëllimisht.
“Në kontekstin e kësaj disa persona janë identifikuar nga policia dhe rastet ku ata janë implikuar po trajtohen me kujdes”, theksohet tutje në komunikatë.
Sipas Policisë suksesi i përpjekjeve të tyre parandaluese mbështetet shumë në përfshirjen e komunitetit.
“Andaj i bëjmë thirrje komunitetit që të qëndroj vigjilent ndaj rrethanave aktuale që ndërlidhen me zjarret, tu përmbahet udhëzimeve të sigurisë nga zjarri të shpërndara nga policia dhe mekanizmat e tjerë, të raportoj menjëherë çdo aktivitet të dyshimtë si dhe në të njëjtën kohë të shmangin veprimet ose aktivitetet të cilat mund të shkaktojnë zjarr”, thuhet në fund të komunikatës./teve1.info/
