Gjendja me zjarret në Komunën e Kamenicës vazhdon të mbetet shqetësuese, ka deklaruar kryetari Kadri Rahimaj. Ai u ka bërë thirrje qytetarëve që të tregojnë kujdes maksimal gjatë qëndrimit në natyrë dhe të shmangin çdo veprim që mund të shkaktojë zjarr.
Sipas njoftimit të komunës, Rahimaj ka kujtuar se ndezja e zjarreve në prona private është e ndaluar dhe paraqet rrezik serioz për jetën dhe mjedisin.
Kryetari ka publikuar edhe fotografi nga zjarret që kanë përfshirë disa zona të Kamenicës, ku ndërhyrje kanë bërë edhe trupat e KFOR-it.
“Pavarësisht lodhjes dhe faktit që nuk kanë pasur asnjë ditë pushimi, zjarrfikësit po japin maksimumin për të mbrojtur jetën, pronën dhe mjedisin. Qendra e Zjarrfikësve është në koordinim të plotë me Agjencinë për Menaxhim Emergjent dhe me ekipet profesionale të KFOR-it, për të garantuar ndërhyrje sa më efikase në çdo vatër,” ka thënë Rahimaj.
