Tre pacientë të moshuar vdiqën dhe shumë të tjerë u plagosën në një zjarr që shpërtheu gjatë natës në një spital në qytetin gjerman të Hamburgut, thanë autoritetet të dielën.
Zjarrfikësit u njoftuan për flakët në spitalin Marienkrankenhaus, pak pas mesnatës. Zjarri shpërtheu në një dhomë në repartin e të moshuarve, në katin përdhes të ndërtesës, dhe u përhap në fasadën e katit sipër.
Nuk ishte menjëherë e qartë se çfarë e shkaktoi zjarrin dhe policia tha se rezultatet e hetimit nuk priten të dielën.
Tre personat që vdiqën ishin burra të moshës 84, 85 dhe 87 vjeç, tha policia në një deklaratë. 34 persona të tjerë u plagosën, njëri prej të cilëve ishte në gjendje të rrezikshme për jetën, ka raportuar AP.
Një pjesë e spitalit u desh të evakuohej. Pacientët e plagosur u trajtuan kryesisht në vetë spitalin, megjithëse dy prej tyre u dërguan në klinikat aty pranë. Zjarri u shua brenda rreth 20 minutash.
Zjarrfikësit thanë se gjetën disa pacientë te dritaret që kërkonin ndihmë. Njerëzit u shpëtuan duke përdorur shkallë dhe përmes vetë ndërtesës.
