Një incident me zjarr ka ndodhur pasditen e sotme në një lokal kafeje në Ferizaj. Ngjarja është raportuar rreth orës 14:36, në kryqëzimin e rrugëve “12 Qershori” dhe “Zenel Hajdini”.
Burime të Tëvë1 kanë treguar se nga lokali ka dalë një sasi e madhe tymi, gjë që ka alarmuar qytetarët.
Ndërkaq policia e Kosovës ka konfirmuar për Tëvë1 se menjëherë pas raportimit kanë dalë në vendngjarje së bashku me zjarrfikësit.
“Sot, rreth orës 14:36, në rrugë kryqin me rrugët ‘12 Qershori’ dhe ‘Zenel Hajdini’ në Ferizaj është raportuar për një incident zjarri në një kafeteri. Në vendngjarje kanë dalë menjëherë ekipet e policisë dhe zjarrfikësit, të cilët po merren me menaxhimin e situatës”, ka thënë Policia.
Sipas tyre, fatmirësisht nuk ka pasur persona të lënduar.
“Nuk raportohet për të lënduar. Ndërkohë, zjarrfikësit kanë lokalizuar zjarrin”, thuhet në njoftim.
Autoritetet kanë bërë të ditur se hetimet për shkaqet e këtij rasti do të vazhdojnë.
“Për çdo zhvillim të mëtejmë lidhur me këtë rast, do të njoftoheni me kohë”, ka bërë të ditur Policia.
