Marrëdhëniet bilaterale mes Kosovës dhe Shteteve të Bashkuara, investimet amerikane, siguria dhe progresi drejt integrimeve euro-atlantike ishin në qendër të diskutimeve të një darke pune të zhvilluar mbrëmjen e së shtunës në rezidencën e Ambasadës Amerikane në Prishtinë.
Kryeministri në detyrë i Kosovës, Albin Kurti, u takua me Brendan Hanrahan, zyrtar i lartë i Departamentit Amerikan të Shtetit për Çështje Evropiane, në një darkë të shtruar nga e ngarkuara me punë e Ambasadës së ShBA-së në Prishtinë, Anu Prattipati.
Në takim ishin të pranishëm edhe ministrja në detyrë e Ekonomisë, Artane Rizvanolli, dhe ministri në detyrë për Komunitete dhe Kthim, Nenad Rashiq.
Në komunikatën për media është bërë e ditur se gjatë diskutimeve, Kurti ritheksoi përkushtimin e Qeverisë për thellimin e partneritetit me ShBA-në dhe e cilësoi këtë shtet si “aleatin më të palëkundur” të Kosovës.
“Ai shprehu gjithashtu mirënjohje për mbështetjen e vazhdueshme amerikane, në të gjitha fazat e zhvillimit dhe shtetformimit të vendit”, thuhet në njoftim.
Ndërkohë, u diskutuan edhe zhvillimet politike në vend, bashkëpunimi rajonal dhe raportet me Serbinë, në kontekstin e procesit të dialogut./teve1.info/
