Policia e rajonit të Ferizajt ka njoftuar se në orët e para të së dielës ka pranuar ankesa nga banorët e Shtimes për zhurmën e shkaktuar nga muzika me zë të lartë, e cila vinte nga disa lokale në rrugën “Imer Devetaku”.
Sipas njoftimit zyrtar, patrullat policore kanë reaguar menjëherë pas ankesave të qytetarëve dhe, në bazë të autorizimeve ligjore, kanë ndërmarrë masa ndaj tre pronarëve të lokaleve për prishje të rendit dhe qetësisë publike.
“Janë shqiptuar tre (3) gjoba kundërvajtëse, secila në vlerë prej 500 euro, në përputhje me Ligjin 03/L-142”, thuhet në njoftimin e Policisë.
Po ashtu, bëhet e ditur se pronarët e këtyre lokaleve, ku zhvillohej aktivitet i lojërave kompjuterike, janë obliguar t’i mbyllin lokalet, ndërsa rasti do t’i përcillet Inspektoratit të Komunës së Shtimes për procedura të mëtejshme ligjore. /teve1.info/
