Futbollisti i Kombëtares së Kosovës, Edon Zhegrova ka vazhduar me paraqitjet e mira te skuadra e Lillet.
Zhegrova ishte protagonisti kryesor në fitoren e Lillet në derbin ndaj skuadrës së Lensit.
Lille triumfoi 2:1 të premten mbrëma në kuadër të xhiros së 27-t të Ligue 1. Zhegrova i shënoi të dy golat e fitores, ndërsa Lille me këto tri pikë ka tubuar 46 pikë dhe zë vendin e tretë në tabelë.
Qysh në minutën e 9-të, Zhegrova e kaloi Lillen në epërsi kurse golin e dytë dhe të fitores ai e shënoi në pjesën e dytë. Golin e tij të dytë personal, Zhegrova e realizoi në minutën e 60-të.
Zhegrova ishte startues te Lille në këtë ndeshje, u ndëshkua me karton të verdhë dhe u zëvendësua në minutën e 76-të.
Tre minuta pas daljes së Zhegrovës, Lille pranoi gol por deri në fund arriti ta mbajë epërsinë dhe ta fitoj ndeshjen.
Aktualisht, Zhegrova ka 5 gola e po aq asistime në 26 paraqitje në kampionatin francez, ndërsa në total këtë edicion ai ka shënuar 11 gola dhe ka 9 asistime në 38 paraqitje në të gjitha garat.
