Futbollisti i Kombëtares së Kosovës, Edon Zhegrova i është gëzuar fitores së Lillet në udhëtim te Bologna në kuadër të Ligës së Kampionëve.
Lille triumfoi 2:1 ndaj Bolognas dhe pas pesë xhirove në Champions, ka tubuar 10 pikë dhe po synon avancimin në fazën tjetër të kësaj gare.
Zhegrova nuk ishte startues te Lille, por u inkuadrua në minutën e 73-të dhe trajneri Bruno Genessio kishte arsye të fortë që nuk e aktivizoj sulmuesin e krahut prej fillimit.
25-vjeçari kishte një lëndim që e pësoi vikendin e shkuar dhe këtë e konfirmoi vet Zhegrova me anë të një postimi në “Instagram”.
“Çfarë fitore e madhe, krenar me këtë ekip. Një lëndim i lehtë, por do të jem 100 për qind i gatshëm shumë shpejt”, ka shkruar Zhegrova.
Zhegrova ka 8 gola e 2 asistime këtë sezon për Lillen dhe mbetet të shihet nëse do të luaj këtë vikend në kuadër të kampionatit francez.
