Me emocione u shfaqën në gjykatore.
Janë familjarë të doktor Hafir Shalës, i zhdukur në luftë.
Të prekur presin vendimin e gjykatës për Sllavisha Filiq, që akuzohet se ka gisht në zhdukjen e familjarit të tyre.
“Të pandehurit Sllavisha Filiq e dënon, me burgim në kohëzgjatje prej 15 vitesh, i cili dënim do të ekzekutohet në momentin kur aktgjykimi të bëhet i formës së prerë”, tha Violeta Namani Hajra – kryetare e trupit gjykues.
Në arsyetimin e shkurtër të gjykatës, u tha se Filiq, në bazë të dëshmitarëve okularë, është personi i cili e kishte ndaluar Shalën dhe e kishte dërguar në hapësirat e Shërbimit Sekret.
“Së pari ishin ndaluar, fillimisht ishin ligjitimuar nga ana e policisë pastaj doctor Hafir Shala, ishte marrë nga i pandehuri Sllavisha Filiq dhe dy persona të tjerë të panjohur, me rroba civile. Dhe është dërguar në ndërtesën e Shërbimit Shtetëror, ku fillimisht i është nënshtruar torturave, rrahjeve dhe nga ajo ditë nuk dihet për fatin e tij”, u shpreh kreytarja e trupit gjykues.
Gjykimi ndaj Filiq u zhvillua në mungesë, për shkak se ai është ende i paarritshëm për organet e drejtësisë.
Familja Shala e mirëpresin këtë vendim të Gjykatës, por thonë se rasti i zhdukjes së familjarit të tyre, nuk përfundon këtu.
“Babi nuk është arrestuar në një kontroll rutinore, për arrestimin e babait ka ekzistuar një urdhërarrest. Baza e të cilit arrest ose adresa, është në zyret e Beogradit. Për çka unë pres që në të ardhmen, shumë shpejt, të zhvillohen procedura tjera të cilat do t’i ndjekin këta hapa në vijim”, tha Gentrit Shala, djali i Hafir Shalës.
Ata presin që fatin e njëjtë Sllashiva Filiqin, ta kenë edhe dy bashkëpunëtorët e tij.
“Kam një falenderim të veçantë për prokurorinë, gjykatat, AKI-në, të cilat kanë bërë një punë të jashtëzakonshme deri këtu sot. Por, shpallja e këtij aktvendimi sot, nuk është fundi i këtij procesi. Për shkak se fillimi i një procesi shumë më të madh që do të na presë në të ardhmen, sepse siç dihet Sllavisha Filiq, tashmë krimineli i dënuar, nuk ka qenë i vetëm kur është arrestuar babi dhe është dërguar në objektin e Sigurimit Shtetëror. Me të kanë qenë edhe dy persona të tjerë”, tha Gentrit Shala.
Aktakuza ndaj Filiq për krime lufte u ngrit në vitin 2023, pas ndryshimeve ligjore që mundësojnë ndjekjen e krimeve të luftës në mungesë të të pandehurve, kur ata janë të pakapshëm për drejtësinë.
