Policia e Kosovës ka kërkuar ndihmën e qytetarëve për gjetjen e një personi të raportuar si i zhdukur, me banim në Prizren.
Sipas njoftimit zyrtar, Riza Rrustem Thaqi, 43 vjeç, nga Rogova e Hasit, Komuna e Gjakovës, është raportuar i zhdukur që nga23 dhjetori 2025, ndërsa rasti është raportuar nga familjarët më 25 dhjetor 2025.
Policia bën të ditur se që nga inicimi i rastit nga Sektori Rajonal i Hetimeve i Drejtorisë Rajonale të Policisë në Prizren, janë ndërmarrë të gjitha veprimet hetimore, mirëpo deri më tani personi nuk është gjetur.
“Me datë 25.12.2025 nga familjarët e tij është raportuar si person i zhdukur që nga data 23.12.2025: Personi Riza (Rrustem) Thaqi, mashkull, i lindur më datë 15.10.1983 në Rogovë të Hasit, Komuna e Gjakovës, me banim në Prizren. Pasi është iniciuar rasti nga Sektori Rajonal i Hetimeve të Drejtorisë Rajonale të Policisë së Prizrenit, që nga ajo kohë janë ndërmarrë të gjitha veprimet hetimore dhe është duke u kërkuar personi i raportuar si i zhdukur, megjithatë, deri më sot nuk është gjetur”, thuhet në njoftim.
Me autorizim të Prokurorisë Themelore në Prizren, Policia ka publikuar edhe fotografinë e personit të zhdukur, duke apeluar për bashkëpunim nga qytetarët që mund të kenë informacione lidhur me vendndodhjen e tij.
Policia u bën thirrje të gjithë qytetarëve që çdo informacion ta raportojnë në numrin emergjent 192, në faqen zyrtare të Policisë së Kosovës në Facebook, apo në cilindo stacion policor në Kosovë.
“Me qëllim të ndriçimit të rastit nga Prokuroria Themelore në Prizren, kemi marr Autorizimin në pajtim dispozitave të nenit 76 prag 2 të KPPRK-së, për publikimin e fotografive të personit te raportuar si i zhdukur, në mediume televizive dhe media sociale, ku kërkohet bashkëpunim-ndihmë nga qytetarët në ofrimin e informatave, që do të na ndihmonin në lokalizimin edhe gjetjen e viktimës. Andaj kërkojmë bashkëpunim nga të gjithë qytetarët, që nëse kane çfarëdo informate apo din diçka për vendndodhjen e personit në foto, të raportojnë policinë në Prizren në numrin 192, në rrjetet sociale, në faqen zyrtare të Facebook-ut të policisë apo në cilin do stacion të policisë në Kosovë”, theksohet në njoftim./teve1.info/
