Deputetja e Lëvizjes Vetëvendosje, Arjeta Fejza, ka konfirmuar se ka pasur një takim mes Albin Kurtit dhe Fatmir Limajt, ku është diskutuar një ofertë konkrete për arritjen e marrëveshjes politike që do të mundësonte konstituimin e Kuvendit të Kosovës.
Në emisionin “Ditari” në Tëvë1, Fejza deklaroi se në fund të javës pritet të ketë një zgjidhje, në përputhje me vendimin e Gjykatës Kushtetuese, i cili ka caktuar afatin prej 30 ditësh për formimin e institucioneve.
“Ka pasur një takim në mes Limajt dhe Kurtit dhe ka pasur një ofertë konkrete. Ne presim që deri në fund të javës të ketë një zgjidhje, ashtu siç është paraparë me vendim të Gjykatës Kushtetuese,” tha Fejza.
E pyetur se çfarë konkretisht ka ofruar kryeministri në detyrë, Albin Kurti, ajo tha se detajet do të bëhen publike vetëm pasi të arrihet marrëveshja.
“Mbasi të bëhet marrëveshja do të shfaqet çdo gjë, çfarë kemi ofruar dhe çfarë është diskutuar. Tani për tani nuk mund të themi diçka konkrete, marrëveshja është ende në proces,” shtoi ajo.
Fejza bëri të ditur se Vetëvendosje ka qenë e hapur për bashkëpunim me disa parti politike në disa faza dhe se u është ofruar edhe mundësia për bashkëqeverisje.
“Ju e keni parë që kemi pasur oferta bashkëpunimi në disa faza. Ne kemi bashkëpunuar edhe me parti që kanë nënkryetarë, për të votuar në pako, sepse është e qartë që posti i kryetarit i takon LVV-së. Në këtë linjë e kemi realizuar bashkëpunimin politik, por njëkohësisht kemi kërkuar edhe një bashkëpunim për bashkëqeverisje,” përfundoi Fejza.
