Zgjedhjet në katër komunat veriore të caktuara më 23 prill duhet të shtyhen përsëri nga e para e vendit ka thënë profesori universitar njohësi i Kushtetutës, Kadri Kryeziu.
Ai ka thënë zgjedhjet e lira nuk mund të mbahen me polici dhe se qytetari që del në zgjedhje duhet të ndihet i lirë.
“Presidentja është dashur përsëri me i shty zgjedhjet derisa të rregullohen disa çështje më madhore edhe për mos me pas ndonjë problem të kësaj natyre dhe është dashur me u konsultu me faktorin ndërkombëtarë. Për me pas zgjedhje demokratike personi që del në zgjedhje duhet më kanë i lirë”, ka thënë ai në emisionin “InfoNata” në Tëvë 1.
Sipas tij, bojkoti nga Lista Serbe i këtyre zgjedhjeve e bënë këtë proces jo legjitim edhe pse si proces është legjitim.
“Zgjedhjet në veri kanë karakter ligjor – legal por mendimi im është se nuk kanë legjitimitet për arsye se partia që përfaqëson shumicën e minoriteteve i ka bojkotua zgjedhjet”, ka thënë Kryeziu.
Ndërsa, deputeti i VV-së, Armend Muja në emisionin “Respublika” ka thënë se zgjedhjet do të mbahen.
Kryeziu ka folur edhe për çështjen e mosdekretimit të Kryeprokurorit të Shtetit, ku tha se presidentja Osmani duhet ta dekretojë sa më shpejtë.
