Analisti, Arton Demhasaj, tha se mendon që ka tendencë që perëndimi ta luhasë pushtetin e Vuçiqit.
Duke iu referuar zgjedhjeve të mbajtura në Serbi më 17 dhjetori, Demhasaj tha se ndërkombëtarët mund të mos reagojnë ndaj këtyre parregullsive në atë proces, me kusht që presidenti serb, Aleksandar Vuçiq, t’i implementojë marrëveshjet e nënshkruara me Kosovën.
“Me shumë gjasë, duket që ka tendencë që perëndimi me e luhat pushtetin e Vuçiqit. Përndryshe nuk do të kishte reagime të tilla të ashpra, duke e ditur që edhe në të kaluarën, zgjedhjet në Serbi kanë qenë komplet të manipuluara. Po ashtu, mendoj që Vuçiq e ka caktuar vet se sa përqind duhet të dalë partia e tij në zgjedhje. Prandaj, në këtë herë reagimet ndërkombëtare janë më të ashpra. Kjo mund të analizohet si një lloj kërcënimi apo shantazhi që i bëhet presidentit të Serbisë, duke i thënë “ti tani e more pushtetin, ne e dimë se si i ke marrë këto vota, i dimë të gjitha manipulimet që kanë ndodhur, mirëpo ne mund t’i mbyllim sytë para këtyre manipulimeve, me kusht që ti të vazhdosh tutje t’i implementosh marrëveshjet që i ke nënshkruar me Qeverinë e Kosovës”, deklaroi Demhasaj në emisionin “Këndi i Debatit”.
Madje sipas tij, Demhasaj thotë se nëse Vuçiq vazhdon të mos i dëgjojë kërkesat e perëndimit, atëherë mund të ketë tendenca për ta rrezuar nga pushteti./teve1.info/.
