Presidenti i Shqipërisë,Ilir Meta,ka bërë thirrje për fushatë të qetë në mbështetje të Kodit Elektoral, ligjeve dhe Kushtetutës, e cila fillon të shtunën (sot), për zgjedhjet e pjesshme vendore të 6 marsit që do të mbahen në 6 bashki.
Meta po ashtu ka bërë thirrje qytetarëve që të marrin pjesë në këto zgjedhje.
“Fushata për zgjedhjet e pjesshme vendore të 6 marsit në Bashkitë Shkodër, Durrës, Lushnjë, Dibër, Vorë dhe Rrogozhinë, që nis sot, është një mundësi e shkëlqyer për subjektet garuese dhe kandidatët e tyre për të parashtruar programe konkrete zhvillimi dhe gjithëpërfshirjeje në përputhje me kërkesat dhe nevojat e qytetarëve. Duke theksuar rëndësinë e zgjedhjeve të lira, të drejta dhe të ndershme, të një fushate në mbështetje të Kodit Elektoral, ligjeve dhe Kushtetutës, të drejtë, transparente, larg retorikës, tensioneve dhe fenomeneve të papranueshme që kemi parë në të kaluarën, i inkurajoj të gjithë qytetarët me të drejtë vote, në të gjashta njësitë vendore, të marrin pjesë masive në zgjedhje”,ka shkruar Meta.
