Lajmin për teve1 e ka konfirmuar Policia e Kosovës, derisa përmes një përgjigje me shkrim ka thënë se kjo është bërë me qëllim që t’i jepet më shumë mundësi të rinjve.
“Policia e Kosovës, përmes video mesazheve, fushatave sensibilizuese dhe takimeve zyrtare që po mbahen në të gjitha rajonet, ç’do herë ka inkurajuar dhe vazhdon ti inkurajon dhe fton qytetarët e të gjitha komuniteteve pakicë që të aplikojnë dhe të bëhen pjesë e Policisë së Kosovës”, thuhet në përgjigjen e Policisë për teve1.
Sipas Policisë, konkursi është hapur, përfshirë me kriteret që parashihen, ku deri më tani ka pasur kandidatë të interesuar nga komunitete të ndryshme për aplikim.
“Me qëllim të dhënies së mundësive shtesë, sikurse edhe në të kaluarën Policia e Kosovës ka vazhduar afatin e aplikimit në këtë konkurse të hapur për komunitetet pakicë, deri me datën 10 shkurt 2023”, thuhet më tej në përgjigjen me shkrim.
Njoftimin për vazhdimin e afatit të aplikimit për pjesëtarë të policisë, kjo e fundit e ka bërë edhe në faqen zyrtare në Facebook, duke thënë se afati zgjatet nga 27.01.2023 deri me datë 10.02.2023.
“Vëmendje: Kriteret në konkurs mbeten të njëjta si dhe kandidatët të cilët kanë konkurruar në këtë konkurs nuk është e nevojshme të aplikojnë përsëri.
Siç jeni të informuar konkursi është hapur, përfshirë me kriteret që parashihen, ku deri më tani ka pasur kandidatë të interesuar nga komunitete të ndryshme për aplikim”, thuhet në njoftimin e Policisë.
