Zëvendësdrejtori i Policisë për Rajonin e Veriut, Veton Elshani ka deklaruar se që nga prilli i këtij viti e deri më sot janë konvertuar në RKS rreth 1500 targa ilegale.
Elshani në emisionin “InfoNata” tha se në vazhdimësi ka pasë qytetarë serbë të interesuar për konvertimin e targave nga ato ilegale në RKS.
“Prej prillit të këtij viti kur unë jam vendosë si zëvendësdrejtor rajonal për Regjionin e Veriut, kemi pasë interesim të theksuar të qytetarëve të nacionalitetit serb të cilët në pika të kontrollit të Policisë, apo kanë ardhë vet në stacion, apo kanë ardhë tek unë në zyre dhe kanë kërku që të dinë se ku është e mundur që të vazhdohet regjistrimi i targave të automjeteve, apo të bëhet konvertimi i tyre në RKS. Këto kërkesa ne i kemi përcjellë te Ministria e Punëve të Brendshme nëpërmjet hierarkisë tonë dhe menaxhmentit tonë policor dhe mandej Ministria e Punëve të Brendshme ka bërë kërkesën në Qeveri dhe Qeveria e ka marrë një vendim që të jepet një afat një mujor për konvertimin e targave nga ato ilegale në RKS”, tha Elshani.
Derisa theksoi se deri në fund të muajit nëntor do të kenë edhe numrin total të veturave të konvertuara.
“Kjo datë është caktu kjo periudhë kohore nga data 1 nëntor deri më 30 nëntor, muajin në të cilin gjindemi tani dhe është në fakt një mundësi, një shansë që qytetarët e veriut të Kosovës të bëjnë konvertimin e targave. Do të thotë nuk është kërkesë që ata duhet prej zorit me bë këtë far pune, ata e kanë mundësinë për me i konvertu këto targa dhe e njëjta është duke u bë. Deri tani në këtë moment që ne po flasim janë diku rreth 1500 targa të cilat janë konvertuar dhe ne konsiderojmë që deri në fund të muajit do ta kemi në përgjithësi edhe numrin total të veturave të konvertuara”, shtoi tutje Elshani.
Ndryshe, Qeveria e Kosovës më 30 tetor ka marrë vendim për zgjatjen e afatit të regjistrimit të veturave me targa targa serbe sikurse “PR”, “KM”, “PZ” e të ngjashme deri më 1 dhjetor.
Çështja e targave ka shkaktuar një sërë krizash në veriun e Kosovës, të banuar me shumicë serbe.
Fillimisht, më 31 korrik të vitit 2022 u ngritën barrikada për shkak të çështjes së targave dhe në nëntor të po atij viti, serbët u larguan nga institucionet e Kosovës në veri, pasi u suspendua drejtori i policisë për rajonin e veriut, Nenad Gjuriq. Gjuriq kishte refuzuar të zbatonte vendimin e Qeverisë së Kosovës për riregjistrimin e makinave me targa serbe në RKS.
Plani i Qeverisë së Kosovës i tetorit të vitit të kaluar parashihte që nga 21 prilli i vitit 2023 të lejohej vetëm qarkullimi i makinave me targa RKS.
Më 23 nëntor 2022, në dialogun e ndërmjetësuar nga Bashkimi Evropian, Kosova dhe Serbia arritën një marrëveshje për targat që lëshohen nga autoritetet serbe për qytetet në Kosovë.
Sipas marrëveshjes, Serbia pranoi që të mos lëshonte më targa të reja dhe Kosova hoqi dorë nga ndëshkimet që parashihte plani për riregjistrimin e makinave. /Teve1.info/
