Mundësia për një koalicion bëri shumë zhurmë. Në media, u rikthye diskutimi për një bashkëpunim midis Lëvizja Vetëvendosje dhe Partisë Demokratike të Kosovës.
Derisa disa e mohuan, së fundmi dolën në pah zëra që e pohuan. E njëri nga ta, ishte numri dy i PDK-së, Enver Hoxhaj.
I kontaktuar nga televizioni, Hoxhaj tha që qëndrimi i tij është ai që e ka deklaruar në televizionin Klan Kosova.
“Nëse unë do të duhej të votoja diçka të tillë në Kuvendin e Kosovës si deputet i Kuvendit, natyrisht se një gjë të tillë do të votoja dhe do të mbështes. Por jo koalicion vetëm për të tejkalu krizën e kryetarit të Kuvendit, kryeministër apo presidentin por një koalicion matematik”, ka thënë Nënkryetari i PDK-së, Enver Hoxhaj.
Mirëpo matematikë ndryshe prej kësaj kanë deputetë nga Vetëvendosja.
Jeta Statovci thotë se qëndrimi i tyre është që të shohin Partinë Demokratike të Kosovës ende në opozitë dhe për bashkëpunim kanë pasur LDK-në dhe NISMA-n.
“Është e vështirë të kuptohet qartë një qëndrim për arsye që ishin kundërthënës mirëpo me arsyet e veta secili nga qëndrimet në fjalë, në anën tonë dhe në gjykimet tona deri më tani në kuadër të diskutimeve tona të brendshme ne nuk e kemi parë të mundur një bashkëpunim me PDK-në për arsye që është llogaritur që botëkuptimet tona dhe parimet tona mbi të cilat ne qeverisim dhe udhëheqin janë dukshëm larg njëra tjetrës për të pasur mundësi të partneritetit dhe bashkëpunimit. Elektoralisht kemi konsideruar se qëndrojmë më afër me LDK-në dhe për shkak të pamundësisë tonë dhe për numrat në mënyrë që të qeverisim të pavarur është konsideruar dhe mundësia e bashkëpunimit me NISMËN”, ka thënë Statovci.
Për analistin politik, Avni Arifin, zëri i Hoxhajt brenda PDK-së është qëndrim ndryshe prej partisë.
Arifi thotë se duhet të shikohet në vazhdim a do të ketë edhe të tjerë individ që mendojnë si nënkryetari Hoxhaj.
“Për momentin e kemi një person, Enver Hoxhaj që ka shpreh qëndrim ndryshe nga partia, megjithatë kjo është ende e parakohshme që të nxjerrët konkluzione se a paraqet një shumicë brenda për brenda strukturave të PDK-së apo jo, deri në atë moment, deri në atë kohë atëherë ne mund të themi që ky është vetëm një shprehje e lirë e mendimit të një individi brenda Partisë Demokratike, qëndrimi zyrtar i PDK-së është qëndrimi i kryetarit të saj dhe kryesisë së saj. Për momentin dhe pse numrat i kanë pasur gjithmonë dhe gjithmonë është përfolur për një mundësi, PDK-ja ka qenë konstistente në qëndrimet e veta, se a do të ketë një ndërrim brenda për brenda të pozicionit të kryesisë së saj të strukturave drejtuese të saj mbetet të shihet, mirëpo mbas asaj që dëgjuam vetë nga kryetari i saj, mund te mbetet zëri i z.Hoxhaj së i vetmuar brenda PDK-së”, ka thënë Analisti politik, Avni Arifi.
Më 1 maj, kryetari i Vetëvendosjes , Albin Kurti u takuar me kryetarin e Partisë Demokratike të Kosovës, Memli Krasniqi.
Këtë ftesë të Kurtit e pat refuzuar LDK-ja në krye me Lumir Abdixhikun.
